Uhlohla amagoli kwelakubo
UYAVUTHA emidlalweni yokuhlungela i-Africa Cup of Nations (Afcon), umgadli we-Orlando Pirates, uJustin Shonga, oshiye abanye abalandeli baleli qembu becasukile ngokugeja amathuba abukeka elula.
Emdlalweni wokugcina we-Absa Premiership ogijinywe yiPirates ngaphambi kwekhefu lemidlalo yamazwe, uShonga waphuma enkundleni kungasekuhle abanye abalandeli sebemcela ngaphandle.
EZimnyama zazishukana naMaZulu FC eKing Zwelithini, eMlaza, emdlalweni owagcina uphele ngo 1-1. Abalandeli ababemkhomba ngaphandle babedinwa wukuthi wayesehlulwe amathuba ayengabeka ezakhe phambili kulo mdlalo.
Nokho kubonakala sengathi ufike eqenjini lesizwe laseZambia wazikhohlwa zonke izinsizi njengoba eshaye igoli umdlalo ngamunye kwabayidlalile.
NgeSonto uShonga ushaye i-free kick enhle ebeka iChipolopolo phambili bedlala neGuinea Bissau emdlalweni kaGroup K. Nokho bagcine behlulwe ngo 2-1. Ukulahla amaphuzu akubasizanga njengoba behleli emsileni ngamaphuzu amane, okunciphisa amathuba okuya kwi-Afcon eCameroon ngonyaka ozayo.
Emdlalweni wokuqala phakathi kwala maqembu, uShonga nguyena oshaye igoli lesibili benqoba ngo 2-1. Kulo mdlalo unozinti weMamelodi Sundowns, uKennedy Mweene uyena ophe iGuinea Bissau igoli ehluleka wukuvimba ibhola abeliphaselwe uzakwabo, lathathwa yizitha ezinyaweni zakhe.
UShonga uphinde washaya igoli bedlala owobungani neGabon ngesonto eledlule.
Lo mgadli, nozakwabo u-Augustine Mulenga, bakwazobe bebhekwe ngamaBhakabhaka ukusiza iqembu ngamagoli uma selidlala kowe-Last 16 yeTelkom Knockout ngempelasonto.
NgoMgqibelo iPirates izokwamukela iChippa United e-Orlando Stadium emdlalweni ozoqala ngo-8.15 ebusuku.
UShonga usashaye igoli elilodwa kwiligi kanti uMulenga unamabili nelilodwa kwiMTN8. UVincent Pule ohoxe kwiBafana ngenxa yokulimala uhamba phambili ngamathathu kwiligi.