AmaDolphins enze into engajwayelekile
IQEMBU lekhilikithi elizinze eThekwini, iHollywoodbets Dolphins, lenze okungajwayelekile lethula ubudlelwano bokusebenzisana nenkampani esebenza ngokugunda amakhanda, ukubhucunga imizimba nokwenza izinzipho eyaziwa ngeSobert Man.
Umcimbi wokwethula lobu budlelwano ubusenxanxatheleni yezitolo, iGetaway, eThekwini, lapho lesi sitolo sizinze khona. Ngokusho kukaBronwyn Cowden ongumnikazi walesi sitolo, abadlali beDolphins bazokwenza noma yini kulesi sitolo kanye ngenyanga bese kuthi uma bebuyela okwesibili (enyangeni eyodwa) bathole isephulelo.
“Sibone kukuhle ukusebenzisana nenkampani efana neDolphins ngoba basezintweni njengathi. Sicabanga ukuthi sisebenza ngomphakathi owodwa, okusho ukuthi kuwumqondo omuhle ukuthi sisebenzisane.
“Silindele ukuthi uma kwenzekile bagunda amakhanda, noma yini enye bafake ezinkundleni zokuxhumana, ukuze bezobona abalandeli babo ukuthi senzani eSorbet Man,” kuchaza uCowden.
UNana Ngubane oyinhloko yezokukhangisa kwiDolphins uthe lobu budlelwano buveza ngokusobala ukuthi babakhathelele abadlali babo.
“Akukhona ukuthi sibadinga nje kuphela enkundleni kodwa siyazi banempilo nangaphandle kwenkundla. Sibone kukuhle sisondelane neSorbet Man ngoba siyibona isezintweni futhi amakhasimende ayo angabantu abaphinde babuke imidlalo yethu,” usho kanje uNgubane obegcizelela ukuthi abadlali bazokufaka konke ezinkundleni zokuxhumana abakwenza eSorbet Man.
USibonelo Makhaya ongumshwibi kwiDolphins bebembhucunga izinyawo kulesi sitolo, uyibona insizwa ukuthi ijabule.
“Ngokwejwayelekile lezi zinto zenziwa kakhulu ngabesimame. Namhlanje ngifundile ukuthi nathi madoda kubalulekile ukuthi sizenze lezi zinto,” kusho uMakhaya.
ULwandiswa Zuma naye ongumshwibi uthe kuyamthokozisa ukusebenzisana kweqembu lakhe neSorbet Man ngoba kumkhuthaza ukuthi azinakekele.