UVruu Pha ubona engayixazulula eyamagoli
UFUNA ukuhlohla amagoli awu-15 kwiMultiChoice Diski Challenge (MDC), uSiyanda “Vruu Pha” Masango ogijimela iFree State Stars.
Ngokusho kwalo mgadli, oneminyaka ewu-21 odabuka eMooi River eMpofana, angaba yimpendulo endlaleni yamagoli eNingizimu Afrika njengoba ngisho nesigaba esiphezulu i-Absa Premiership, abagadli bayo bayehluleka ukufika emagolini awu-15.
Njengamanje uMasango useshaye amagoli amathathu kwiMDC, wakha elilodwa. Ugqamile nasemdlalweni wezakhe neKaizer Chiefs, eSugar Ray Xulu Stadium, eClermont, eshaya igoli lesibili kulo mdlalo. Umdlalo uphele ngo 2-2.
“Ngifuna ukushaya amagoli awu-15. Ngibona kungenzeka uma ngizimisele futhi ngisebenza kanzima. Ngifuna kuphele unyaka ozayo sengithole inkontileka neqembu elikhulu kwiStars ngoba ngifuna ukudlala kwiAbsa Premiership,” usho kanje uMasango.
Phakathi kwamaqembu awagijimelile yiReal Kings edlala kwiNational First Division (NFD) neBlack Leopards ashiye kuyona ngasekuqaleni konyaka.
“Ngichazeka kakhulu uma ngibona uPercy Tau edlala. Indlela ahlakaniphe ngayo, ukuhlukumeza izitobha, ukushaya kwakhe amagoli ikona okwenza ngibukele kuyena,” kubeka uMasango.
Lo mdlalo uqedele u-matric wakhe eDabulamanzi Combined ngo-2014.
Ebuzwa ukuthi iliphi iqembu alibona lizokhala lemuke nesicoco seMDC, uMasango uthe: “Ngisola ukuthi iCape Town City izosithatha. Indlela abadlala ngayo ayikholakali. Ngikhuluma nawe nje, baqhwakele kwi-log, futhi basishaya nathi ngo 2-0.”
UDuncan Lechesa uyena opheka iStars kwiMDC. UMasango uthe okunye okumenza abe sefomini ukusebenzisana nalo mqeqeshi ongumakadebona.
“Ungumqeqeshi osezingeni eliphezulu kakhulu. Kwesinye isikhathi uyaye angithethise kodwa lokho akungidikibalisi ngoba usuke efuna ngenze kangcono. Isikhathi esiningi ukhuluma nami, lokho okungenza ngizethembe bese ngidlala kahle,” kusho uMasango.