Ufuna umehluko kwelokuphasa
UFUNA ukunyusa izinga lokuphasa kwa-matric libe ngaphezulu kuka-80% uNgqongqoshe wezeMfundo KwaZulu-Natal uMnuz Mthandeni Dlungwane.
UDlungwane uthe ezinhlelweni abazenzile kulo nyaka bafuna ukunyusa izinga cishe ngo7% lidlule elangonyaka odlule elalingu-76%, ukunyusa izinga lokuphasa izifundo ezifana neMaths neSayensi ngo-10% kanjalo nokunyusa izinga labafundi abaphasa ngamabachelor ngo-10%.
“Siqale ngokunyusa izinga lokuphasa lisuka ku-66.4% ngo-2016 laya ku-76% ngo-2017. Kulo nyaka sifuna ukulinyusa libe ngaphezulu kuka80%,” kusho uDlungwane.
Uthe ngoNovemba nyakenye zonke izincwadi zase zihanjisiwe ezikoleni.
Uqhube wathi kulo nyaka bafuna ukuqeda ngezikole ezithola phakathi kuka-0% no-10%, nokunyusa isibalo sezikole ezithola u-100% okungenani ngo10%.
“Sibasekile abafundi ngokubafundisa ngamaholidi, sibuye sibe nezinhlelo emisakazweni ukuze sibasize. Besifuna ukuthi kufike izivivinyo sebezilungele.”
NgoMsombuluko kubhale abafundi abangu-4273 ababhale ikhompyutha.
Bonke abafundi abangu-187 726 ababhala kulo nyaka bazoqala ngephepha lokuqala lesiNgisi ngoLwesibili oluzayo.
Kulaba abangu-152 747 babhala ngokugcwele kuthi abangu-34 980 babhala ngasese.
Zingu-27 izikhungo zokumaka kanti zingu-1753 izikole okubhalelwa kuzona kulesi sifundazwe.
Ukumaka kuqala ngoDisemba 3 kuphothulwe ngoDisemba 14. Angu214 ama-deputy chief markers, angu-1496 amasenior markers abangu-74 ngamachief markers.
Bebonke abazomaka bangu7481 bemaka amaphepha angu-1.9 million.
“Sinezinhlelo zokuqinisekisa ukuthi akukotshelwa,” kusho uDlungwane.
Kulo nyaka kuzobe kuqala ukuthi abafundi babhale iSign Language kanti bangu-23 abazobhala kulesi sifundazwe.