Abaqamba amanga ababaniki ukuthula abafela inkululeko
MHLELI: Njengoba silokhu siqhela osukwini esilubiza ngo-Uhuru futhi isizukulwane sikaMnuz Nelson Mandela sihamba siya kobabamkhulu, sizokhohlwa amagazi alabo achelela isihlahla senkululeko. Yileli gazi esilichamelayo njengoba silalela isithangami seJaji Raymond Zondo sokulawulwa koMbuso yidlanzana.
Ngihlala osibeni ngoba ngicubungula indlela yayizolo yokuzabalaza neyamanje. Ake ngikhe phezulu emlandweni wenkululeko bese ngibuza umbuzo. OMnuz Harry Gwala, Bafana Duma, uJaji Albert “Albie” Sachs noMfundisi Richard Lapsey umzabalazo wabashiya bengenazandla noma zingasasebenzi. UMnuz Sicelo Mhlauli wafihlwa engenaso isandla ngoba basinquma abacindezeli besatshiswa ngaso njengoMnuz Fezile Madoda Jacobs. Ubudoda bukaMnuz Zenzile May babekwa eshalofini ebe emile bese ishalofu livalwa ngesankahlu.
UMnuz Mlungisi Griffiths Mxenge bamgwaza amanxeba abalelwa ku-35 ngoba wayelwa.
UMnuz Msizeni Shadrack Maphumulo bambulala base begcina isidumbu sakhe, bamfaka noNksz Grace Cele noCorine Bischoff noMnu Danger Nyoni ukuze uma sebebashaya, bamane bacabange isidumbu sikaMaphumulo.
Inkosazana yakwaNdwandwe yadayiswa amaqabane ayo eSwatini ngo1987 ngoZibandlela ayishaya amaphoyisa, yaze yacela ukuthi bayinike amaplastiki ukuze yakhe iphenti ngoba elayo isilingcolisile ngenxa yesihluku sesibhaxu. Bayincenga kaningi ukuthi ibe ngumdayisi, ibe yi-askari, yenqaba. Uma ibekwa umkhono wekati esiphongweni bese icela ukucula ihubo Nkosi Sikeleli iAfrika, bayibulala, njengoMnuz Gideon Mdletshe, Stanza Bopape, Zinto Cele, Neil Aggett , Ahmed Timol noNksz Busi Majola, igazi layo lachelela isihlahla senkululeko.
UMnuz Sizwe Kondile wayeshaya ucingo eseLesotho, amthumba amaBhunu ngendlela athumba ngayo abazabalazi abanjengala makhosazana: Shirley Nyanda, Ntombi Kubheka noGrace Cele. Bavuma ukuba nguJudas Iskariot, besathunjiwe bathola ulwazi ukuthi ngobani ababedayisa i-ANC eLesotho, babhala incwadi eya kwi-ANC eLesotho ebaqwashisayo. Uma iphoyisa elimhlophe lifika lizomlanda, wayehlala phezu kombhede, ezwe kufohlozela into phansi kombhede, awubhule athole incwadi kaKondile, bambulala, bamshisa, umlotha wakhe njengozakwabo bePebco 3: Sipho Hashe, Champion Galela noQadawuli Godolozi awutholakalanga. Umlotha kaKondile nowabe Pebco 3 wachithwa emfuleni.
UMnuz Gideon Niewoudt wanikwa uR42 000 ukuthi aqambe amanga athi uMnuz Bulelani Ngcuka wayeyimpimpi.
Leli phoyisa laliconsa igazi lamaqabane e-ANC.
Abamhlophe abanjengoJenny Schoon nendodakazi yakhe uKaryn, Ruth First, Jacqueline Quin babulawela le nkululeko yethu. Ngokunjalo oDulcie September, Ashley Kriel, Basil February, Babla Salojee, Sadha Naidoo, Lenny Naidu nabanye abantu base Trustfiled, Bhisho, Sharpeville, Boipatong, Shobashobane, Duncan Village, izitshudeni zasoNgoye naseSoweto, ulusha elaziwa ngeChesterville 4, Cosas 4, Gugulethu 7, ulusha olunjengabaMnu Bathandwa Ndondo, Chris Thandazani Ntuli, Phumezo Nxiweni, Mazwi Vilakazi no-Elias Mtshali, sikhululekile ngenxa yabo namagazi abo aphalala.
Bakobandayo oPetros noJabu Nzima, Mary Rathalela, Lindie noJoe Phahle, Victoria noGriffiths Mxenge. Ababuyanga besaphila oMnuz Judson Khuzwayo, Msizeni Maphumulo, Big Boy Guma, William Khanyile, Khrishna Rabillal nabanye, amagazi abo aphalala kwamanye amazwe.
Uma amaBhunu ehluleka ukubamba uMnuz Mensday Maponya, abulala uMnuz Stanza Bopape noJapie Maponya. Ngokunjalo uMnuz Mokgapi Diphale, ahluleka amaBhunu ukubulala uJoyce Diphale noMnuz Roller Masinga eSwatini, ayobulala umfowabo eSoweto engenze lutho. Uma sebekhathele ukubulala abangama-askari, uMnu Eugene de Kock wathi oMnuz Ninela, Brian Ngqulunga abaphanjaniswe nemvula.
Ngabe abaya kwikhomishini bafike bakhulume iqiniso elinguhhafu, bashiye iqiniso elinguhhafu, bayakucabanga yini ukuthi le nkululeko ayehlanga njengemana kepha kwaphalala igazi?
Ngiphoxekile uma uMnuz Nhlanhla Nene efihla iqiniso ngokuya kwakhe “eshibhini” laseSaxonwold, yini efihla iqiniso? Lo mbuzo akakawuphenduli kodwa usexolisile ngokufihla iqiniso njengoGehazi eqamba amanga kuMphrofethi Elijah mhla ebuya koqola uNaaman.
Uma esebanjiwe ngoba esenochoko, useguqa ngedolo phansi wathi: “Baba Wethu
WaseZulwini sithethelele ngokuba namanga”.
Lo mkhuba wokuqamba amanga usuyacika, uhlula isiguqo, impepho noMbhishobhi Desmond Tutu noPastor Vusi Dube ongumsekeli kaNxamalala (Mnuz Jacob Zuma) benoMfu Carl Niehaus.
UGehazi wakuleli, uhleke yedwa uma okaSthenjwa (Nene) ebanjwa kuhle komthakathi, abanjwe egibele imfene emzini womuntu.
Ake nicabangele labo abangathi ngosuku lovuko bakhihle isililo ukuthi ngamaqabane anukubeza ukhondolo lwabo nemiphefumulo yabo eyaphumela mina nawe ukuze sikhululeke.
Uma niqamba amanga noma nifihla iqiniso njengoSthenjwa, nithunuka imindeni eyabulawela izihlobo zabo nguhulumeni wamaBhunu. Sondelani konembeza benu, ningenzisi okwamakholwa, afike one izinsuku eziyisithupha namahora angu-20 bese eyocela intethelelo, abuyele esonweni, aphinde futhi acele intethelelo.
Labo abavikela uSthenjwa, abangazi ukuthi “usuleleni esikhundleni ngoba baningi abone ukudlula yena”, bakhohlwa ukuthi yini kanti uThuma Mina? Angithi iyisisekelo sobuholi obuqotho nobuthembekileyo. Siyanda Mhlongo KWADUKUZA