Sizogwetshwa ngo-2019 isishoshovu se-#FeesMustFall
SIKHALE ngokuhlukumezeka emoyeni isishoshovu somkhankaso i-#FeesMustFall njengoba siyoze sigwetshwe ngonyaka ozayo.
UMnuz Bonginkosi Khanyile owayeyisitshudeni eDurban University of Technology (DUT) bekulindekele ukuba agwetshweizolo enkantolo yaseThekwini kodwa kwangenzeka.
Ngokusho kombuso bekulindwe umbiko ophakamisa ukuthi kumele agwetshwe kanjani nombiko wosonhlalakahle basejele othinta ukugwetshwa kwakhe.
Umbuso uthe njengoba le mibiko ingakaqedwa ucela icala lihlehliselwe uNovemba noma uDisemba nonyaka kodwa ummeli kaKhanyile wakhala ngokuthi umatasa uyoze athole ithuba lokuba senkantolo ngonyaka ozayo.
IMantshi uMnuz Siphiwe Hlophe inikeze uKhanyile ithula lokuba akhulume njengoba icala lakhe lingeke liqhubeke kulo nyaka.
“Umbuso wathi ufuna ukungigweba namhlanje kodwa namhlanje uthi awukulungele ukuba ngigwetshwe. Lokhu kuyangihlukumeza kakhulu emoyeni ngoba angikwazi ukuqhubeka nempilo yami.
“Kumanje ngiyancipha nasemzimbeni ngoba ngihlale ngicabanga ukuthi kumele ngigwetshwe. Angazi noma ngizofakwa ejele noma cha,” kusho uKhanyile.
UHlophe uthe naye uyafisa ukuba icala lisongwe kodwa akukho angakwenza.
Icala ube eselihlehlisela uJanuwari 28 ngonyaka ozayo.
UKhanyile walahlwa amacala amane, kwangu-13 ayethwese wona.
UKhanyile wazivumela amacala elokubandakanyeka nelokudala udlame emphakathini, amabili okuhluleka ukulandela umyalelo wamaphoyisa nokutholakala nesikhali esiyingozi (isihlilingi).
Kuthiwa lesi sihlilingi wayesisebenzisa ukujikijela amaphoyisa ngamatshe ngesikhathi kunombhikisho we-#Feesmustfall.