ISharks izimisele ukuqeda ngeLions nezethenjwa zayo
“ASINANDABA noma ngabe iLions iletha izethenjwa zayo, thina sifuna ukunqoba qha.”
Lokhu kushiwo uHyron Andrews oyilock yeCell C Sharks ngaphambi komdlalo obhekwe ngabomvu ngoMgqibelo phakathi koShaka neXerox Golden Lions kowandulela owamanqamu kwiCurrie Cup, eKings Park Stadium, ngo-2.30 ntambama.
U-Andrews uthe uyazi ukuthi iLions izoletha izingwazi zayo ebezidlala eqenjini lesizwe amaBhokobhoko, nakwiSuper Rugby okunguMalcolm Marx, Warren Whitely no-Aphiwe Dyantyi.
“Asifuni ukuzikhathaza ngokuthi iLions izoletha bani ishiye bani. Esikufunayo thina ukunqoba singene kowamanqamu. Ekugcineni kosuku sizobe siphelele sonke siwu-15 iqembu ngalinye uma sesisenkundleni. Ngakho okwethu ukuthi siqhubeke nezinhlelo zethu ngalo mdlalo, sibheke nezindlela esinganqoba ngazo umdlalo,” usho kanje u-Andrews.
ISharks ike yayishaya iLions kuseyimidlalo yamaqoqo kulo mqhudelwano. EzikaRobert Du Preez Snr, zishaye iLions ngo 37-21, enkundleni efanayo eThekwini.
“Okwasisiza sibashaya wukuthi udonga lwethu lwasemuva lwaba nenkani kakhulu, lwangavuma lutho. Kuzofanele nakulokhu senze kahle emuva, kuthi uma siphethe ibhola silisebenzise ngobuhlakani. Bayiqembu elithandayo ukuhlasela ngakho nalokho kufanele sikulungiselele,” kuqhuba u-Andrews.
Ngeledlule, iSharks ibukise ngeTafel Lager Griquas iyishaya ngo-41-11, eKimberly. U-Andrews uthe umdlalo wabo neGriquas ngeledlule, bawusebenzise njenge-quarter final.
“Ungabuza noma yiliphi iqembu, liyazi ukuthi uma uya eKimberly akulula neze ukunqoba. Obekwenza isimo sibe nzima kakhulu ukuthi bekuwumdlalo wabo wokugcina kwazise bese bephumile emqhudelwaneni kodwa sikwazile ukubabamba, sanqoba.
“Kubalulekile ngezizathu ezahlukene ukuthi sifike kowamanqamu,” kubeka u-Andrews obeqala ngqa ukukhuluma nezintatheli selokhu afika kwiSharks.
Ngokusho kwalo mdlali, zintathu izinto okufanele baziqaphele kwiLions, yi-scrum, line-out nendlela yabo yokukhahlela nxa bethole izinto ezifana namaphenathi namaconversion.
Komunye umdlalo owandulela owamanqamu weCurrie Cup ngoMgqibelo, kuzobhekana iWestern Province neBlue Bulls eNewlands Stadium, eKapa, ngoMgqibelo ngo-5 ntambama.