Kuhlonishwa uRhee ngemidlalo
UZOHLONISHWA ngemidlalo ezoqanjwa ngegama lakhe, uSibusiso “Rhee” Zuma, odlalele iqembu laseDenmark iminyaka emihlanu.
UZuma uhlelelwe indumezulu yomcimbi, yiFC Copenhagen, nalapho kuzoba nemidlalo emibili okuzodlala khona izinkakha abedonsa nazo eminyakeni edlule.
Owokuqala uzoba seThekwini (enkundleni esazomenyezelwa) ngoDisemba, bese kuthi owesibili ube seDenmark ngoMeyi wangonyaka ozayo.
Ekhuluma neSolezwe izolo, uZuma uthe uzizwa ethobekile ngokuthi ahlonishwe yiqembu ayelidlalela.
“Ngijabule ngokwenziwa yiCopenhagen, futhi ngizizwa ngithobekile.
“Ngiyafisa nokho ukukuveza ukuthi mina angiyena umuntu othanda ukugqama noma ukubukwa.
“Mina nginentshisekelo yokusiza intsha, nabantu abadinga usizo,” kusho uZuma.
Udumo lukaZuma luqale ngeminyaka yawo-1995, esagijima kwi-African Wanderers ayishiye ngo-1998.
Ube esejoyina i-Orlando Pirates wahamba kuyona ngonyaka ka-2000, eseyodlala kwiCopenhagen.
Ufike kwezwakala eDenmark njengoba eshaye amagoli awu-40 emidlalweni ewu-145. Kunegoli alishaya sakuqethuka ngo2001, ezakhe zidlala neBrøndby kowamanqamu emqhudelwaneni iSuperliga Championship.
Lowo mdlalo waphela ngo 3-1, igoli lesibili leCopenhagen ilona leli likaqethu namanje elingakhohlakali emlandweni weCopenhagen kangangoba kwakhiwe isichuse ngoZuma.
Kwase kuphele iminyaka ebalelwa kweyishumi iCopenhagen ihluleka ukunqoba lesi sicoco kodwa ngokufika kukaZuma, kwashintsha konke lokho.
“Izinsuku zale midlalo engizobungazwa ngayo azikaqinisekiswa kodwa ngeke liphele isonto elizayo kungacacile. Sizoba nomdlalo wokuqala ozoba sedolobheni lami eThekwini ngoDisemba, bese kuthi owesibili ube seDenmark ngonyaka ozayo,” ubeke kanje uZuma ozalelwe eHammarsdale nokho oseGoli kulezi nsuku.
Ebuzwa ngokuthi ngabe amaqembu azodlala azoma kanjani uthe: “Kuzoba neqembu labangani bami, engidlale nabo kwiBafana Bafana nabanye engidonse nabo kanzima kwiPremier Soccer League (PSL). Kuzoba khona nelinye elizokwaziwa nge-Africa Eleven, elizohlanganisa izinkakha zasezwenikazi i-Afrika engisondelene nazo, esidlale nazo e-Europe. Omunye wabo kuzobe kuwuBenjamin Mwaruwari”.
Ngokusho kukaZuma, ulindele indumezulu yomcimbi ngoDisemba, kangangoba kungenzeka kugcine kungabanga nje ibhola elidlalwayo kuphela.
“Sizoba nosaziwayo abazosivakashela. Kungenzeka nabo bagcine sebenowabo umdlalo abazowudlala ukundlalela umdlalo wethu,” usho kanje uZuma.
Amanye amaqembu adlalelwe uZuma iMamelodi Sundowns, FC Nordsjaelland, Vasco Da Gama neSuperSport United.