Inkakha yeBucs iphupha ngokukhiqizela iBafana
INKAKHA ye-Orlando Pirates neBafana Bafana, uWillem Jackson, inesifiso sokukhiqiza izindimbane zabadlali abazoba yizinsika emaqenjini ePremier Soccer League (PSL) nakwelesizwe ngisho ngabe lokho kuyaphambana nezifiso zeHighlands Park okuyiyona emqashele lo msebenzi.
UJackson, ozakhele udumo njengesitobha sokuqina seBloemfontein Celtic nePirates, ubeyilungu eliqavile kwiBafana ngesikhathi iyodlala kwiNdebe yoMhlaba ngo-1998. Ngemuva kokuwabeka ethala amakhokho uJackson usebenze kakhulu kwiPlatinum Stars lapho eqale khona njengephini likaCavin Johnson (osekuMaZulu). Uke wahlala esihlalweni sobukhosi (ewumqeqeshi) kodwa wabuye wehliswa.
Njengamanje uJackson usebenza kwiHighlands engelinye lamaqembu angazange ayiqale kahle isizini kwiMultichoice Diski Challenge (MDC). Iqembu lakhe aliyazi iwini ngemuva kwemidlalo emihlanu njengoba selishaywe kwemithathu ladlala ngokulingana amahlandla amabili.
Lo mqeqeshi uthe akakhathazekile kangako ngokuthi kwenzekani kwiMDC ngoba yena inhloso yakhe akukhona ukudla lesi sicoco kepha ufuna ukukhiqiza abadlali. “Kwesami isikimu kugcwele abafana abaya esikoleni ngoMsombuluko kuze kube Olwesihlanu. Okwami ukucijisa laba bafana ngolwazi oluzoba yisinkwa kubona. Yebo ngiqashwe yiHighlands Park kodwa isifiso sami ukukhiqizela wonke amaqembu akhona yinqobo nje uma ebona ukuthi umdlali usesilungele isigabeni esikhulu.”
UJackson uthe liningi kakhulu ithalente eNingizimu Afrika kodwa abaqeqeshi abaningi bafuna izinto ezinkulu esikhundleni sokuhlala nabafana phansi bachazelwe ngokuthi yini eyenza umdlali webhola elikhokhelayo aphumelele kukhona konke akwenzayo. “Kule sizini nginesifiso sokufaka okungenani abafana abathathu eqenjini elikhulu. Uma lokhu kungenzeki lapha (kwiHighlands Park) kodwa kukhona amanye amaqembu akhombisa izimpawu zokufuna abanye babadlali bami ngizoshaya phansi ngedolo kubaphathi ukuthi babadedelwe. Ngizokhiqiza abafana abangagcini ngokuhlonipha abanye abantu, bahloniphe umdlalo webhola uqobo bazi ukuthi wumsebenzi, akuyona into yokubukwa emgwaqweni.”