Kuzoshukana obhululu kowePirates neChippa
ISIKHWISHIKHWISHI seChippa United, uThabo Rakhale, nomqeqeshi waso, u-Eric Tinkler, abanomlando ne-Orlando Pirates bavumelana ngokuthi okuningi kuzobe sekuhlangene uma sebebhekene naleli qembu.
La maqembu azitholana phezululu kowe-Last 16 yeTelkom Knockout ngoMgqibelo ngo-6 ntambama, e-Orlando Stadium.
I-Pirates izokwamukela iChilli Boys ebophele abadlali abaningi abanomlando kwiBucs. Lapha kukhona uDaine Klate, odle inqwaba yezicoco, kanti ibophele noMark Mayambela naye oke wadlala kuleli qembu eminyakeni edlule. Nakuyona iBucs abadlali abafana noDiamond Thopola noPaseka Mako bake bagijima kwiChippa.
UTinkler uthathe umsebenzi wokucija iChippa kuDan Malesela ngo-Agasti. Kusukela ethathe lo msebenzi ukhala ngokuthi abadlali bakhe abakangeni khaxa esitayeleni sakhe kodwa njengoba besebenza nsuku zonke ngenxa yokuma kweyeligi ngoba kudlala imidlalo yeFifa, lo mqeqeshi uthe konke kuzobe sekumi ngomumo ngoMgqibelo.
“Kuliqiniso ukuthi bengimelwe ukuguqula izinto eziningi ngesikhathi ngithatha iqembu ngakho-ke kufanele nginikwe kahle ithuba. Abadlali engibaficile bahle kodwa bekusamele ngihlale nabo phansi ngibafake umqondo wami ngendlela engifuna sidlale ngayo. Kuyashesha-ke nokho ngasendleleni yokudlala osekusele ukuthi sibe yimiqemane ngokwanele,” kusho uTinkler. Lokhu kunanelwe uRakhale, othe ukusebenza kwakhe noTinkler esikhathini esedlule kumenza azizwe ephoqelekile ukusiza ozakwabo ukuthi babambe amaqhinga alo mqeqeshi. UTinkler useke wasebenza kwiCape Town City nakwiSuperSport United ngemuva kokusuka kwiPirates.
“Konke kuyahlangana impela ngoba nakweyesihle sekuyabonakala lapho uTinkler afuna sifinyelele khona ngendlela yokudlala. Engikuqaphelile ukuthi ozakwethu bebenenkinga yokuzwa umqeqeshi ngase ngikwenza umsebenzi wami ukuthi ngisize lapho ngikwazi khona ngoba lokho kuzokwenza iqembu libe ngcono. Ngijabule kakhulu ngesikwenza njengoba kuvaliwe nje futhi nginethemba lokuthi sizofika kwiPirates sekuhlangene okuningi ebesilokhu sikuzama njengoba imidlalo yeligi isamile,” usho kanje uRakhale.
Kulindeleke ukuthi iPirates iwuthwale lo mdlalo kwazise idlalela ekhaya kanti nefomu yayo kweyeligi ayiyimbi kangako uma uyiqhathanisa neyezivakashi. Abanye abadlali abazobe bekhona kulo mdlalo asebeke bawadlalela womabili la maqembu singabala kubona uJames Okwuosa, Abel Mabaso, Linda Mntambo, Thamsanqa Sangweni noPhetso Maphanga.