I-ANC ifuna bajeze abafaka imali eVBS
I-ANC eLimpopo ithi izobathathela izinyathelo abasebenzi bomasipala abagwazelwa ukuze bafake imali yalabo masipala eVBS Mutual Bank.
Izolo i-ANC ithe umhlangano wangoLwesibili uphakamise ukuthi bajeziswe abaphule umthetho womasipala bafaka imali eVBS.
Iveze ukuthi bonke abasebenzi bomasipala akade befake imali eVBS bebebizelwe ekomkhulu lale nhlangano ukuze bazochaza ukuthi kwakwenzenjani befaka imali kuleli bhange.
IPhini likaSihlalo we-ANC eLimpopo, uNkk Florence Radzilani noMgcinimafa we-ANC kulesi sifundazwe uMnuz Danny Msiza bayathinteka embikweni wokutamuzwa kwemali ecela kuR2 billion eVBS.
UMnuz Donald Selamolela okhulumela i-ANC eLimpopo uthe bayalele omasipala abafaka imali eVBS ukuthi baqinisekise ukuthi abafaka imali kuleli bhange bayajeziswa.
“Bonke abaphula umthetho womasipala bafaka imali eVBS kufanele bajeze ngoba benza lokhu bazi kahle ukuthi akuvumelekile. Lolu daba lungcolise igama lenhlangano futhi siphatheke kabi ukuthi imali yomasipala yaphathwa budedengu,” kusho uSelamolela.
USelamolela uthe yize uNkk Radzilani ebhalwe embikweni waseVBS ukuthi wathola isipho sikaKhisimusi sikaR1 million ngokugqugquzela umasipala iVhembe ukuthi ufake uR250 million kuleli bhange kodwa ngeke bamthathele izinyathelo ngoba igama lakhe selithunyelwe kwi-intergrity committee.
UNobhala we-ANC eLimpopo uMnuz Soviet Lekganyane uthe banethemba lokuthi iVBS isengavuswa ngoba ineqhaza elibalulekile lokusiza abampofu ukuthi balondoloze imali yabo.
“Sizosebenzisana nazo zonke izinhlaka ezithintekayo ukuzama ukuvusa iVBS ngoba ibalulekile eLimpopo,” kusho uLekganyane.