Ihlehlile ingqungquthela kazwelonke yeNkatha
IHLEHLILE ingqungquthela kazwelonke ye-IFP obekulindeleke ukuthi ibe ngempelasonto ezayo Ondini.
Le ngqungquthela bekufanele ibanjwe kusukela ngo-Okthoba 26 kuya ku-28.
Isinqumo sokuhlehlisa le ngqungquthela ebhekwe ngabomvu lapho uMengameli weqembu inkosi Mangosuthu Buthelezi kulindeleke ukuthi azibeke phansi khona izintambo sithathwe emhlanganweni wesigungu esiphezulu seqembu ngoMsombuluko.
Okhulumela i-IFP kuzwelonke uMnuz Mkhuleko Hlengwa ukuqinisekisile ukuthi ingqungquthela bayihlehlisile ngenxa yezinselelo ezikhona.
“Kunezifunda ezisibhalele zikhala ngokuthi kukhona lapho umthethosisekelo weqembu ungazange ulandelwe khona sabe sesinquma ukuthi kumele sixazulule zonke izinkinga ezikhona ngaphambi kokuthi sibambe ingqungquthela ngoba besingafuni ukuqhubeka nengqungquthela ebingaphonselwa inselelo,” kusho uHlengwa. Uthe iqembu libize umhlangano ozoba ngeSonto eCoastlands Hotel eThekwini lapho lizobhunga khona ngezindaba zeqembu kubalwa nodaba lwengqungquthela. Izindaba zokuhlehla kwengqungquthela azizange zehle kahle kwamanye amalungu eqembu, njengoba amanye ezwakalisa ukungenami. NgoLwesibili, emahhovisi eSolezwe bekufona amalungu enhlangano ezindaweni ezahlukene abekhala ngokuhlehla kwalengqungquthela.
Ilungu le-IFP eMtshezi elikhulume neSolezwe kodwa lacela ukuthi lingadalulwa lithe baphatheke kabi ngesinqumo sobuholi sokuhlehlisa ingqungquthela.
“Sizizwe ngoMsombuluko izindaba ezithi ingqungquthela ayisekho futhi, yimbi lento eyenzekayo ngoba ithunaza iqembu, kunabaholi abathile abadala esigungwini esiphezulu seqembu okuyibo abafuna ingqungquthela ingahlali ngoba bengamfuni uMhlonishwa uMnuz Velenkosini Hlabisa ophakanyiselwe esikhundleni sikamengameli,” kusho leli lungu.
Liqhube lathi esinye isizathu esenza ukuthi kuhlehle ingqungquthela ukuthi labaholi abadala eqenjini abafuni ukuphuma ezikhundleni zabo.
Omunye wabaholi baseNdumeni naye ocele ukuthi angadalulwa uthe bashayana ngamakhanda ngalesi sinqumo ngoba akekho obesilindele.
“Sizwa kuthiwa lesi sinqumo sithathwe isigungu esiphezulu seqembu kodwa thina njenge zinhlaka zeqembu besingakaziswa ngokusemthethweni,” kusho leli lungu.
Mayelana nezinsolo ezenziwa ngamanye amalungu eqembu athi esigungwini esiphezulu kukhona abangamfuni uHlabisa, uHlengwa uthe uHlabiswa usekwa yiwo wonke umuntu ebuholini obuphezulu nasezinhlakeni zeqembu, wengeza ngokuthi yingakho aphakanyiswa ngoelethu.
Uphikile ukuthi kukhona abaholi abadala enhlanganweni abangafuni ukuphuma ezikhundleni zabo.
“Ngifisa ukuxwayisa abantu ukuthi abayeke ukukhuluma izindaba ezingekho ngeqembu ngaphansi kwezihlahla ngoba nginesiqiniseko sokuthi bonke abantu abakhuluma lezo zinto bebengekho emhlanganweni,” kusho uHlengwa.