Indlala isadla lubi ebantwini abaningi
SIYAKHULA isibalo sabantu abaququdwa yindlala. Izibalo zango-2016 zeStatistics SA, ezicubungula ngemindeni, iGeneral Household Survey, zikhombisa ukuthi abantu abangu-7.4 million babulawa yindlala kanti manje kulinganiselwa ukuthi lesi sibalo sesicishe siphindaphindeke kabili.
Yize izibalo zikhomba lokhu kuyavela ukuthi iNingizimu Afrika isemazweni ayishumi okuthiwa ayakwazi ukukhiqiza ukudla okwanele kodwa lokho kudla akufinyeleli kubo bonke abantu ngoba abanye abanayo imali eyenele yokukuthenga. Lezi zibalo ziholela ekutheni uhulumeni asungule izinhlelo eziningi ezizosiza ekutheni abantu abangakwazi ukuzikhiqizela ukudla abazokudla bathole izinsiza ukuze bakukhiqizele imindeni.
Uphiko olubhekele ukudla enhlanganweni yezizwe, i-UN Food and Agriculture Organisation (FAO), luveze okushaqisayo ocwaningweni lwalo luka-2018. Kulolu cwaningo kuvela ukuthi ngesikhathi abanye abantu bebulawa yindlala, okwenza ukuthi imizimba yabo ingakwazi ukwenza okumele ikwenze, abanye bakhuluphele ngokweqile nakho okubeka impilo yabo engcupheni. IFAO ithe lesi simo sidinga ukusukunyelwa ngokushesha kuqhanyukwe namasu okusiza abantu ukuthi badle ukudla okunezakhamzimba ezidingekayo.
Imindeni entulayo kuthiwa kuba nzima ukuthi ithole ukudla okunempilo igcine idla ukudla okungenamsoco ngoba yikhona ekwazi ukukuthenga.
UNgqongqoshe wezoLimo KwaZulu-Natal, uMnuz Themba Mthembu, uthe kubantu ababulawa yindlala kuleli abesifazane nezingane yibona abaningi.
Uthe lokhu kuholele ekutheni izinhlelo zabo zibabhekelele kakhulu abesifazane ukuze kwehle isibalo.
UMthembu ubesho lokhu ngesikhathi kugujwa usuku lokudla iWorld Food Day, KwaMachi, ngoLwesibili. Uthe ngokombiko we-UN bangu-43% abesifazane abasemkhakheni wezolimo emhlabeni kodwa uma sekubhekwa ngasohlangothini lobunini bomhlaba kuvela ukuthi balima emhlabeni ongewona owabo.
“Abesifazane kulo mkhakha yibona abahlakula amasimu, batshale imbewu baphinde bavune kodwa umsebenzi wabo awuqhakambiswa. Yingakho lolu suku sibuye silusebenzisele ukuqhakambisa nokubonga abesifazane ngegalelo labo. Siqwashisa ngesimo sendlala esikhona, sisize umphakathi ngezinsiza, siphinde sinxuse amazwe omhlaba ukuthi nawo aphonse esivivaneni ukuze kusizwe abangenako ukudla okwanele,” kusho uMthembu.