Bafuna ukubuyisa uthando lwesibhakela
“SIFUNA ukubuyisa isibhakela sakudala, esaduma emakhaya lapho kwakugcwala khona amahholo phama”.
Lawa ngamazwi kaphromotha wesibhakela uZandile Malinga weStarline Boxing Promotion ehlele indumezulu yesibhakela eMadadeni Tvet College ngeSonto.
UMalinga uhlele izimpi iziyisishiyagalolunye ezihlanganisa abashayisibhakela abasafufusa. Impi ebhekwe ngabomvu ngeyebhande leKZN Featherweight phakathi kukaSithembiso Maduna noMpendulo Mbonambi.
“Ozonqoba phakathi kukaMaduna noMbonambi uzongena ezilinganisweni zeBoxing South Africa (BSA). Lokhu kukhombisa ngokusobala ukuthi siyawenza umsebenzi esivumelane ngawo noMnyango weZemidlalo Nokungcebeleka esifundazweni iKwaZuluNatal, ngoba sifuna kwande abashayisibhakela abancane. Kuzo zonke izimpi kungenwa mahhala, ngakho silindele abantu ukuthi batheleke ngobuningi babo,” kusho uMalinga.
UThembinkosi Gubevu, insizwa yendawo, ngomunye wazobe bebhekwe ngabomvu. UGubevu uzolwa impi yemizuliswano emine noMhlengi Mhlongo.
“Sifisa ukuthi uGubevu anike ithemba entsheni yaseNewcastle. Sifuna anike ithemba kulowo osengene shi ezidakamizweni ngoba uzobona ukuthi nangu owangakubo enza okuhle. Sifuna abantu baseNewcastle namaphethelo babuye ngezinkani esibhakeleni ngoba babesithanda eminyakeni edlule,” kulandisa uMalinga.
Isikhalo sokushabalala kwesibhakela kwithelevishini senza ukuthi lo mdlalo ungabe usagqama njengaphambilini. UMalinga uthe uma abantu bengaphuma ngobuningi babo baseke isibhakela emazingeni aphansi, akangabazi ukuthi ithelevishini ingasisakaza futhi isibhakela.
“Siyakuqonda ukuthi nxa isibhakela sisiyisa emadolobheni asithakaselwa kakhulu ngenxa yezindleko kodwa uma sisiyisa emalokishini nasemakhaya kuba ngcono kakhulu ngoba kuvuka uthando lwakudala. Sifisa ukuthi kugcwale amahholo emakhaya, abantu baphume. Lokhu kuzocindeza abethelevishini nabezindaba ukuthi beze lapho isibhakela sikhona ngoba kuzobe kukhona abantu,” kusho uMalinga.
Enye impi okubhekeke ukuthi ihehe izoba phakathi kukaSnamiso Ntuli ozolwa noMarcel Botha oyindodana kaFrancois Botha owake walwa noMike Tyson ngo1999.
Uphromotha weLudonga Boxing Promotion, uThulani “Sir” Magudulela, uthe uyakuthokozela ukuhlelwa kwemiqhudelwano yalolu hlobo ngoba kwakha nobumbano kophromotha abasakhula nabangomakadebona.