UCobra weneme ngoKhenyeza kweleMDC
UMQEQESHI waMaZulu FC kwiMultiChoice Diski Challenge (MDC), U-Ayanda “Cobra” Dlamini, uthi angakujabulela ukusebenzisana noMabhudi Khenyeza eqenjini lakhe eligila izimanga kulo mqhudelwano.
Emasontweni ambalwa edlule leli phephandaba lishicelele udaba ngemibiko ethi uKhenyeza kungenzeka kube yisizini yakhe yokugcina, ngemuva kweminyaka ewu-18 engumdlali ebholeli elikhokhelayo.
UKhenyeza kuthiwa uke waba nomhlangano nabaphathi boSuthu waluneka udaba lwakhe, eveza ukuthi akasathandi ukudlala ibhola kodwa usefisa ukuba ngumqeqeshi.
Isolezwe labalula nokuthi uKhenyeza ufuna ukulekelelana noDlamini eqenjini leMDC oSuthwini.
Kuthiwa abaphathi bamncengile ukuthi okungenani aqedele isizini ka-2018/2019. UDlamini upheka Usuthu olusendaweni yesine kwi-log yeMDC.
“Ngingakujabulela kakhulu ukusebenza noMabhudi, empeleni siyaye sikhulume naye. Kumanje uneqembu lakhe aliphekayo. Siye sikhulume ukuthi uma singasebenza ndawonye singajabula ngoba sinogqozi lokusiza abafana. UKhenyeza unothando lwebhola, futhi unothando lokuqeqesha,” kusho
uDlamini. Isikhulu esiphezulu kuMaZulu, uLunga Sokhela, sisanda kuveza ukuthi uma uKhenyeza engaliyeka ibhola, ngeke bamdedele eqenjini. “Ngonyaka odlule, sivuselele inkontileka kaMabhudi ngonyaka. Sixoxa naye njalo, ukubeke kwacaca ukuthi usefike esigabeni empilweni yakhe lapho khona kufanele asize abadlali abasebancane. Uyakuqonda futhi ukuthi impilo yakhe njengomgadli ayisefani naseminyakeni eyishumi eyedlule. Kukhona akuvezile ukuthi ufisa ukukwenza ngempilo yakhe ngemuva kokudlala. Simncengile ukuthi ayiqede le sizini, ngokuthi adlale, ngoba ungumholi. Uma esethi usefuna ukushiya njengoba kwenza uSiyabonga Nomvethe, naye ngeke simuvimbe,” usho kanje uSokhela, oLundi ngeledlule.
Siqhubeka lesi sikhulu sichaza, sithe uma uKhenyeza esewagaxa emgibeni amakhokho, ngeke alushiye Usuthu.
“Sizomgcina noma yikanjani. Siyakholelwa ekutheni kukhulu angakwenzela iqembu uma engaseyena umdlali. Siyabagcina abadlali esikholelwa ekutheni banomsoco odingwa yileli qembu, nangaphandle kwenkundla. Abadlali babukela kuyena, unolwazi olunzulu ngebhola, esikholwa wukuthi uzokwazi ukuludlulisela kubadlali,” kucacisa uSokhela.