Imeya ithuswe yincwadi eyinukayo
KUPHELE amazwi kwiMeya kaMasipala iZululand, uMfundisi Thulasizwe Buthelezi ngesikhathi yethula incwadi evela kuNgqongqoshe wezokuBusa nokuBamabisana neziNdaba zoMdabu KwaZulu-Natal, uNkk Nomusa DubeNcube imnuka ngokugxambukela ohlelweni lwethenda yamanzi kulesi sifunda nefuna incazelo kuSomlomo ukuthi ngabe iziphi zinyathelo ezithathele zona.
Le ncwadi iputshukele ezandleni zikaButhelezi ngoLwesithathu kanti uye wayithumelela Isolezwe eshaqekile. “Nami angazi ukuthi kwenzakalani kodwa le ncwadi njengoba nawe uyibona ibhalelwe uSomlomo uSbu Nkwanyana. Mhlampe kungakuhle uthinte yena ngoba mina angazi lutho,” kusho uButhelezi ngamafuphi.
Le ncwadi kafushane nje uma inqanyulelwa imi kanje: “Somlomo ukhansela TD Buthelezi sibikelwe ngezinsolo zokuthi uhambele umhlangano wethenda yohlelo lokufakelwa kwamanzi, okuyiRudimentary South Water Supply (Drilling of Boreholes) Project kanye neRudimentary North Water Supply (Drilling of 60 Boreholes) Project. Ngokwemigomo yeMFMA ngaphansi kukaSection 117, ikhansela alivumelekile ukuba sekomitini noma ohlakeni lukubhidela amathenda futhi alinalo nelincane ilungelo lokuhambela imihlangano yakhona. NgokukaSection 118 (a) weMFMA ohlelweni lokukhishwa kwemisebenzi kamasipala okuyiSupply Chain Management. NgokukaSection 173(5)(e) weMFMA ukubeka kucace ukuthi kungaba ikhansela noma umsebenzi kamasipala ophula le mithetho engenhla, usuke enze icala elibi. Ngakho sicela uSomlomo njengenhloko eyengamele lemithetho kamasipala ukuba asinikeze izimpendulo zingakapheli izinsuku ezintathu, ukuba asicacisele ukuthi ngabe yikuphi akwenzile ukuqinisikisa lezi zinsolo ezibhekene nokhansela uButhelezi. Ngicela zonke izimpendulo uzithumele kuNkk Sinegugu Mchunu noMnuz Zakhele Majozi.Yimi ozithobayo, Nomusa Dube-Ncube, MPL, uNgqongqoshe wezokuBusa nokuBambisana neziNdaba zoMdabu KwaZulu-Natal.”.
Okhulumela uMnyango wezokuBusa NokuBambisana neziNdaba zoMdabu, uMnuz Lennox Mabaso uthe akakwazi ukuphawula ngoba ubambeke komunye umbuthano woMnyango oKwaNongoma.
UNkwanyana onguSomlomo eZululand uthintwe usuku lonke lwangoLwesithathu nayizolo ngoLwesine kodwa iselula yakhe ibikhala ize ibenesibibithwane engayibambi.
Kuthe Isolezwe uma lixhumana nomunye umholi ongumgani wakhe , wamfonela wamthola kuyo le nombolo ebelimthinta ngayo.
“Hhayi uNkwanyana uthi akayazi leyo ncwadi futhi ayikafiki kuye, ngiqeda ukukhuluma naye manje futhi besengithe akeze la kimi ukuze akwazi ukukhuluma nawe. Manje angimazi ukuthi ucingo lwakho akalubambi ngani ngoba kimi uyaphendula,” kusho lo mholi eligodliwe igama lakhe.