Kufezeka iphupho kuFezeka
UKUKHULELA endaweni egajwe ububha eNtshangwe phakathi kwaseThekwini naseMgungundlovu akuzange kuyivimbe intombazanyana eneminyaka engu-13 uFezeka Nxumalo ukufezekisa amaphupho akhe.
Lo mfundi wasesikoleni samabanga aphansi, iNchanga Primary ungomunye wabafundi abangu-2 300 abaqokiwe KwaZulu-Natal ukuyofunda esikoleni sikaOprah Winfrey, i-Oprah Winfrey Leardership Academy.
Lo mfundi owenza uGrade 7, uthanda isiNgisi nezibalo kanti uzoqala ukufunda kulesi sikole ngonyaka ozayo.
UFezeka uhamba cishe ihora uma eya esikoleni noma eseya ekhaya nsuku zonke. Uphuma ekhaya ngo-7 ekuseni ukuze afinyelele esikoleni ngaphambi kokuba singene ngo-7:45.
Unina kaFezeka, uNksz Zinhle Nxumalo (32), uthe akazi kuthi kufanele ayiveze kanjani injabulo yakhe.
“Ngijabule kakhulu ngendlela engachazeki, ngazikhulisela yena ngingedwa futhi ngiyaziqhenya ngaye. Ngifuna abe nekusasa engingabanga nalo. Ngifuna abone kuthi ngingamenzela noma yini.”
Uthe wayifundisa indodakazi ukuthandaza, wathi uke ayizwe ibonga uNkulunkulu ngomama wayo.
“Kungathi singabandawonye, uma ngikhala noma kunesimo engikuso, uyena ongiduduzayo, ngizomkhumbula kakhulu.”
Uthe nangesikhathi eseGoli izinsuku ezintathu wamkhumbula kakhulu.
Uthisha wezibalo kaFezeka, uNksz Leashnee Pooran ube neqhaza elikhulu ekwenzeni amaphupho akhe afezeke.
UNksz Pooran uyena owafaka isicelo sokuthi uFezeka ayofunda kwi-Academy.
Emuva kokudlula izigaba ezine zokhetho, uFezeka ube esethola incwadi emamukela ukuyofunda kulesi sikole.
“Izikhathi ezinjengalesi yizo esiziphilelayo singothisha,” kusho uPooran.