Konke kuvuna iCell C Sharks koweCurrie Cup

UMQEQESHI weCell C Sharks, uRobert du Preez, nabadlali bakhe ngeke babe nethuba lokucasha ngesithupha njengoba cishe konke kuvuna bona kowandulela owamanqamu neGolden Lions.

Lo mdlalo weCurrie Cup ukusasa ngo-2.30 ntambama, eJohnson Kings Park, eThekwini.

Kulo mdlalo iSharks, eqede isendaweni yesibili, izokwamukela iLions eqede endaweni yesithathu enkundleni yayo lapho kulindeleke khona ukuthi baphume ngezinkani abalandeli.

Ngaphandle kwabalandeli nenkundla okuvuna ezikaDu Preez, nomphumela wakamuva ngesikhathi kuhlangene la maqembu kulo mqhudelwano ukhomba ukuthi iqembu lasekhaya yilona elisendaweni engcono. ISharks inqobe kwiLions ngo 37-21 esikhathini esingangenyanga.

Komunye umdlalo owandulela owamanqamu kuzobe kubhekene iWestern Province (eqede iqhwakele) neBlue Bulls eqede isendaweni yesine. Ayisikhombisa kuphela amaqembu aseke adla lesi sicoco kusukela saqalwa ngo-1892.

Kulawo maqembu ayisikhombisa iSharks isidle lesi sicoco amahlandla ayisikhombisa. Esokugcina isithathe ngo-2013 lapho ishayele khona ekhaya iProvince.

Akazange asishintshe kangako isikimu esidlale neGriquas uDu Preez ngaphandle kokubuyisa uThomas du Toit noDaniel du Preez.

“Asisekho manje isikhathi sokucabanga okuningi ngaphandle kokuqinisekisa ukuthi uma kuphela imizuzu ewu-80 kube yithina esinamaphuzu amaningi. Sibhekene neqembu elinzima kakhulu kwazise ligqishe nangamaBhokobhoko kodwa nakithina isimo esifanayo. Ukunqoba yikhona esicabanga ngakho kodwa siyazi sibhekene neqembu elingasihlula uma singazithambisa,” kusho uDu Preez.

Sesisonke isikimu sikaDu Preez azogadla ngaso kwiLions simi kanje: Curwin Bosch, Sbu Nkosi, Jeremy Ward, Marius Louw, Lwazi Mvovo, Robert du Preez, Louis Schruder (ukaputeni), Daniel du Preez, Tyler Paul, Jacques Vermeulen, Hyron Andrews, Gideon Koegelenberg, Thomas du Toit, Akker van der Merwe noJuan Schoeman.

Ebhentshini: Chiliboy Ralepelle, Mzamo Majola, Coenie Oosthuizen, Luke Stringer, Jean-Luc du Preez, Cameron Wright, Leolin Zas no-Aphelele Fassi.