Ukhwele wadilika kwabasebenzisa izikhundla ukwebela umphakathi
UNOBHALA jikelele wamaKhomanisi uDkt Blade Nzimande ugxeke abalwela inkululeko abazicebisayo wathi ukuthi walwa akukuniki igunya lokuntshotsha.
UNzimande ukusho lokhu izolo ekhuluma enkonzweni yesishoshovu se-SACP uMnuz Eric Stalin Mtshali enkundleni yemidlalo eClermont.
“Ukuthi walwa nobandlululo akusho ukuthi sekumele usebenzise umlando ukuze webele abahluphekayo. Njengoba sikhumbula uMtshali kumele sikhumbule ukuthi akumele sisebenzise izikhundla enhlanganweni noma kuhulumeni ukuze sebe,” kusho uNzimande.
Uthe ukube abantu abafana noMtshali abazange bazabalaze ngabe abekho lapho bekhona.
Ukhale ngokuthi manje sekukhona abaholi abangathembekile.
“Kunabaholi abangabafuni abantu abahluzile ngoba kulula ukubatshela ukuthi benzeni ukuze bafeze izinhloso zabo. Kumele sikhumbule ukuthi izinqumo ezithathwa wuhlaka oluphezulu kumele zihlonishwe ngabantu abaphansi,” kusho uNzimande.
Uthe akungathi uma sekuthathwe izinqumo ngabaholi bese begijima beya phansi beyothi lezo zinqumo akumele zilandelwe.
“Akubona abaholi labo imidlwembe. Abantu banamanga bafuna ukuzisuthisa bona,” kusho uNzimande.
Uthe izwe libhekene nezinkinga okubalwa ukwehla komnotho wathi kumele kwesekwe izinhlelo zikahulumeni zokuvuselelwa komnotho.
Uthe kunenkinga yokulawulwa kombuso yidlanzana ngakho wonke umuntu akasukume kuvikelwe izwe.
UDkt Nkosazana Dlamini Zuma, obemele uhulumeni uthe kuwe insika ngoba uMtshali ubengakufuni ukwehlukana.
Uthe nokungezwani phakathi kwamadlelandawonye bekumkhathaza kakhulu.
Uqhube wathi kubalulekile ukuthi kube nobumbano ukuze kufezeke iphupho likaMtshali.
Abanye babantu abebekhona kulo mngcwabo kubalwa uNgqongqoshe wamaPhoyisa uMnuz Bheki Cele, owezaseKhaya uMnuz Malusi Gigaba, owezokuBusa ngokuBambisana neZindaba zoMdabu uDkt Zweli Mkhize, uNdunankulu uMnuz Willies Mchunu nabanye abaholi okubalwa noDkt Cassius Lubisi, onguMqondisi jikelele ehhovisi likaMengameli.