Usola ozakwabo abahlangene nezitha
IMEYA kamasipala iNquthu KwaZulu-Natal isola ozakwabo ngokuzama ukuyihlanganyela nezitha ngoba behalela isikhundla sayo njengoba kukhona abafuna ikhonjwe indlela ngenxa yezinsolo zokuthumba abasebenzi abakhipha amathenda ngoba bengayilaleli.
UMnuz Mabilabila Kunene oyiMeya ye-IFP, ukusho lokhu ephawula ngesikhalo samakhansela nabanye abaholi beqembu lakhe abangagculisekile abamsola ngomhobholo wamathenda abathi usehlukumeza abesifazane abasehhovisi elikhipha amathenda ngoba ebasola ngokunikezela ngethenda kaR10 million yabaqaphi enkampanini abengayifuni.
Elinye ikhansela le-IFP elicele ukungadalulwa lithe sebezimisele ukuvota ne-ANC uma kunomhlangano wokungabethembi ubuholi bemeya ngoba sebekhathele ukuziphatha kwayo.
UKunene kuthiwa uyazi ukuthi ngendlela angafunwa ngayo kungathi noma bemthola ewile bafike bamqedele ngamatshe.
“Ngikhuluma nawe nje lo muntu uthumbe intombazane esebenza kwaSupply Chain Management wayoyivalela emzini wakhe okwaVulamehlo eyihlukumeza eyipheka ngemibuzo ethi kungani benikezele ngethenda yabaqaphi enkampanini i-Ocean Down. Ubhale incwadi yokuba kuphenywe ngokuqokwa kwale nkampani nokuyinto esikhombisa ngokusobala ukuthi ugaxele ezindabeni zamathenda ezingamdingi ngoba yena ungusopolitiki. Sesiyafisa ukuba Inkatha isilekelele imkhiphe ngoba ubeke phambili ukuzisuthisa yena kunokunaka izidingo zomphakathi. Lo muntu akahluphi kumasipala kuphela kodwa naseqenjini usixakile ngoba usebhale incwadi yokuba kuqalwe phansi ukhetho lwesiyingi obelungenyanga edlule. Empeleni uma singadedela amahlazo akhe i-IFP ngeke iphinde iyiphathe iNquthu,” kusho ikhansela elicele ukungadalulwa.
UKunene uthe uyazi ukuthi kunabantu abangaphakathi eqenjini abahalela isikhundla sakhe nabenza konke okusemandleni ukungcolisa igama lakhe.
“Kuqale kwaba uKhongolose obulokhu uzama ukungingcolisa kodwa wehluleka. Manje sekuyilaba bakithi. Abakhohlwe ngoba angiyi ndawo. Ngithunywe yi-IFP ukuba ngihole loya masipala. Ngakho nango-2019 ngizobe ngiseyimeya kanti nangaloya nyaka ngizobe ngiseyimeya. Intombazane okuthiwa ngayithumba kungani ingalivuli icala ukuze ngiboshwe. Phela icala lokuthumba libi kabi ngakho kufanele ngabe sekuvulwe icala ngashushiswa,” kusho uKunene.
Uqhube wathi kuqale uKhongolose wamsulela ngamacala angawazi waze waboshwa waya enkantolo eDundee.
Uthe akazwani nenkohlakalo futhi uNyazilwezulu alubafundisanga ukungcola nokweba kodwa lubayala ngokuziphatha ngobuqotho ngakho akakwazi ukwenza inkohlakalo.
NgoJulayi i-ANC ifake isiphakamiso sokungabethembi ubuholi bukaKunene yabala izizathu zenkohlakalo nokungaphathi ngendlela kuhlanganisa nokuhlulwa ukuhambisa izidingo emphakathini.
Imizamo yokuthola uMnuz Mkhuleko Hlengwa okhulumela i-IFP ukuthola ukuthi inhlangano isizwile yini ngokwenzeka kulo mkhandlu ongaphansi kwayo ayiphumelelanga kuze kwashaya isikhathi sokushicilela.