Umnikelo ekulweni eyobhejane
ABEZAMAPAKI kuleli, iSouth African National Parks (SANParks) bahlabane ngemoto ezobasiza empini yokulwa nokubulawa kobhejane.
Lokhu kulandela ukunikelelwa kwabo abakwaToyota South Africa Motors (TSAM) ngemoto iToyota Hilux ngenhloso yokubasiza emikhankasweni yabo yokulwa nokubulawa kobhejane.
Le moto kulindeleke ukuthi ikwazi ukubasiza uma bezama ukubheka ukuthi abekho yini abazingela obhejane. Kuthiwa inobuchwepheshe obukwazi ukuveza uma kukhona umuntu onyakazayo ehlathini okuwusizo kakhulu ezindaweni ezifana naseKruger National Park.
Isikhulu sakwaSANParks, uMnuz Dumisani Dlamini sithe le moto izokwazi ukubasiza ukuthi basheshe bathole imininingwane ezokwazi ukubasiza ukulwa nalesi sihlava.
“Ukuzibandakanya kwabakwaToyota ekutheni banikele ngalo mnikelo kukhombisa ukuzimisela kwabo ekulweni nobugebengu obuthinta izilwane zasendle futhi siyakubona kakhulu,” kusho uDlamini. Uthe bayakubonga nokubambisana osekukhona phakathi kwabo namalungu omphakathi wonkana nezinkampani ezinkulu zakuleli. Uthe le moto izoba yithuluzi elibalulekile elizosiza ukuqinisa izinhlelo zabo asebezifakile ukulwa nokubulawa kobhejane. NgoDisemba abakwaToyota banikele ngezimoto ezine amaToyota Avanza eKruger National Park ukuze zisetshenziselwe ukulwa nobugebengu. Isikhulu sakwaToyota, uMnuz Calvyn Hamman sithe bazibophezele ekutheni banikele ezinhlelweni zomphakathi. Uthe kubalulekile ukuthi kuvikelwe izilwane zasendle, ikakhulu obhejane nezinye ezisengozini yokuphela, yingakho bezimisele ngokweseka abakwaSANParks. THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.