Kusolwa umbango wamatekisi kudutshulwa, kufa abane
KUSOLWA umbango wamatekisi ngokushona kwabane ezigamekweni zabadutshulwe eVerulam naKwaDukuza.
Lezi zigameko okuvela ukuthi zihlobene zenzeke ngokuhlukana njengoba kwesokuqala kudutshulwe usomatekisi eNyokeni eHezelemere, eVerulam ngabo-8.30 ebusuku ngoMsombuluko.
Isolezwe lithole ukuthi abahlaseli babaleke ngemoto abebehamba ngayo iToyota Condor. Kuthiwa kutholakale ukuthi imoto yabahlaseli ingasedolobheni KwaDukuza laba bajahwa ngabantu abangaziwa abadubule imoto yabo.
Kuthiwa imoto iphaphalazile yangena ezihlahleni. Ibhekiwe kodwa yangatholakala ngaleso sikhathi.
Ize yatholwa izolo ekuseni amaphoyisa.
Isolezwe lithole ukuthi laba abahlaseliwe kuvele ukuthi basebenza embonini yamatekisi nabo.
Okhulumela amaphoyisa KwaZulu-Natal, uColonel Thembeka Mbele, uziqinisekisile lezi zigameko wathi kuvulwe amacala amane okubulala.
Ngokophenyo kugasele abasolwa emzini kamufi ngoMsombuluko ebusuku bamdubula. Kwesinye isigameko esenzeke namhlanje (izolo) ngo-5 ekuseni amaphoyisa aKwaDukuza avule icala lokubulawa kwabantu abathathu abadutshuliwe. Ngokophenyo laba bebehamba kuN2 ngesikhathi behlaselwa abantu abangaziwa,” kusho uCol Mbele.
Umthombo weSolezwe osondelene nalolu daba uthe laba basolwa abathathu bahlaselwe ngoba bebenukwa ngokuthi babulale usomatekisi eVerulam.
“Kusolwa umbango wawo amatekisi ngokubulawa kwabo yize kungacaci ukuthi kubangwani,” kusho umthombo weSolezwe ocele ukungadalulwa.
Imenenja ehhovisi leSantaco eKZN uMnuz Sfiso Shangase ithe bayadumala ukuthi kusekhona izigameko zokuhlaselana kosomatekisi.
“Kumanje sihlela umkhuleko weSantaco ezobe ihlangene noMnyango wezokuThutha wokukhulekela khona ukubulawa kwabantu kule mboni, oThukela ngo-Okthoba 28,” kusho uShangase.