Kuvele inkohlakalo kaR20 million kumasipala
KUVELE amahlazo ngombiko kaNgqongqoshe wezokuBusa ngokuBambisana neziNdaba zoMdabu KwaZulu-Natal amayelana nenkohlakalo yaseNdumeni, edlule kuR20 million.
Lokhu kutholwe Isolezwe ngemuva kokuthi ngesonto eledlule izikhulu zomnyango zitheleke eNdumeni zanekela amakhansela umbiko.
Amakhansela adonswe ngendlebe ukuba angathi vu, kuze kuthathelwe izinyathelo abathintekayo.
Embikweni Isolezwe elihletshelwe ngawo kuvela ukuthi kunezikhulu esezahamba eNdumeni ezinukwayo ekukhwabaniseni imali yentuthuko yomphakathi. Kuvela ukuthi ibikhishwa ngokuthi iyonikela ezinkonzweni ezithile kodwa kwatholakala ophenyweni ukuthi ibidliwa yizo namanye amakhansela asagodliwe amagama awo okwamanje.
Bekuvela ukuthi ibibalelwa kuR30 000 ebikhishwa ngenyanga, iphiwa amasonto nezinhlangano ezingenzi nzuzo. Ophenyweni kuvela ukuthi ibingena emabhange abefundisi abathile bese behlukaniselana nezikhulu namakhansela athile.
Elinye ikhansela kuvela ukuthi likhwabanise imali engaphezulu kuka-R100 000 lifaka izicelo ngamakhilomitha emoto angumgunyathi.
Elinye ikhansela lesifazane elihlonishwayo emkhandlwini kuthiwa belikhwabanisa nesoka lalo elinguBen 10, lilithengele imoto kanokusho lona lazithengela iBMW, labhidliza indlu yakubo engamagumbi amane layiphendula isithabathaba.
Isikhulu sakwaSupply Chain Management esiboshwe izolo woKlebe ngecala elingahlangene nenkohlakalo naso siyasolwa kulo mbiko. Kuvela ukuthi besigwazisa izinkampani ezithize izizumbulu zemali ukuze zithole umsebenzi eNdumeni. Kuvela ukuthi kuthinteka nesikhulu saseZululand nesiseMnyangweni kaMgcinimafa kuzwelonke.
Umbiko uveza ukuthi kule mali engaphezu kuka R20 million, eningi ibisetshenziswa ezinhlelweni ezingahlangene nentuthuko. Ikhansela le-EFF, uMnuz Nathi Khanyile, uMnuz Anthony Raubenhuisener weDA noMnuz Lucky Khumalo bathe badonswe ngendlebe ukuthi bangaphawuli kwabezindaba kuze kube kuthathelwa izinyathelo abathintekayo.