Babhale besemanzini abaka-matric emva kokubulawa komfundi
BABHALE izivivinyo zabo beqashwe ngamaphoyisa abafundi baseGobizembe High KwaSwayimane kulandela isigameko sangoMsombuluko lapho kugwazwe khona ngommese umfundi washona kubangwa intombi.
U-Ayanda Chonco (17) ofunda uGrade 9 kulesi sikole kuthiwa ubezama ukulamulela omunye umngani wakhe afunda naye obehlaselwa ngabanye abafundi.
Ngokuthola kweSolezwe abafana bandawonye abafunda uGrade 11 baxabane nomunye ofunda no-Ayanda emcimbini obungempelasonto.
Bebebanga intombi okuthiwa ifunda kwesinye isikole esiseduze naseGobizembe.
Umngani ka-Ayanda kuthiwa ubashayile laba bandawonye abafunda uGrade 11 wabehlula base bethembisa ukumbamba esikoleni ngoMsombuluko.
Sekuphuma isikole abasolwa kuthiwa baphume ngokushesha bathatha izikhali zabo ebezifihlwe ngaphandle kwesikole.
Kuthe u-Ayanda esephuma nomngani wakhe, abasolwa base bezama ukugwaza umngani. U-Ayanda kuthiwa ungenele wagcina egwazekile washonela khona esikoleni.
Usihlalo wesigungu sabazali (SGB) uNksz Tholakele Zondi uthe badumele kakhulu ngalesi sigameko kodwa bazama konke ukuba abafundi baqhubeke nokubhala.
“Sishaqekile sonke ngalesi sigameko esenzeke ngesikhathi sokubhalwa kwezivivinyo zokuphela konyaka. Ngokuthola kwethu lo mfundi obulewe ubelamulela umngani wakhe njengoba kade exabene nabanye abafundi kubangwa intombi efunda kwesinye isikole. Lokhu kuxabana kuqale emcimbini obungempelasonto kwaze kwakapakela lapha esikoleni. Ekuseni namhlanje (izolo), abafundi bafike bekhala nokuphoqe ukuba singenele sizame ukubaduduza. U-matric uqalile ukubhala wabhala kahle. Amaphoyisa abekhona ukuzoqapha isimo ngesikhathi abafundi bebhala ngoba asazi ukuthi kukhona yini abanye abafundi abazofuna ukuziphindiselela,” kusho uNksz Zondi.
Kwenzeka lesi ehlo nje, kuso lesi sikole ngo-2017 kwabulawa omunye umfundi lapho ayeqashe khona. Isolezwe lithole ngenyanga edlule bagwetshwe, iminyaka engu-20 abalahlwe ngaleli cala.
Okhulumela amaphoyisa KwaZulu-Natal, uColonel Thembeka Mbele, uthe umsolwa ecaleni lokubulala umfundi uzovela maduze enkantolo.
“Kuboshwe umsolwa oneminyaka engu18 ngecala lokubulala umfundi oneminyaka engu-17 endaweni yaseGobizembe. Amaphoyisa aseWartburg asaqhubeka nophenyo,” kusho uCol Mbele.
Uyise kamufi uMnuz Scelo Maphumulo uthe ubuya ebusuku emsebenzini ngakho akazange ayithole incazelo ngokwenzekile kwindodana yakhe.
“Ngisalinde abakubo kwalo mfana okuthiwa uyena obulele ingane yami, bangichazele ukuthi kwenzakeni, okwamanje ngisathole ukuthi ugwaziwe nje esikoleni. Angazi bekwenzenjani ngoba ngibuye ebusuku ngivela emsebenzini izolo (ngoMsombuluko). Namaphoyisa abengakafiki la ekhaya ukuzochaza. Kuphela nje ukuthi sisashaqekile njengomndeni akukho okunye esingakusho ngaphandle kwalokho,” kusho uMaphumulo.
Okhulumela uMnyango wezeMfundo eKZN, uMnuz Kwazi Mthethwa, uthe basebenzisana noMyango wezokuThuthukiswa koMphakathi ukweluleka abafundi ngokomqondo. Akuphazamisekanga ukubhalwa kwezivivinyo kwabaka-matric.