Babulawe bebhacile ababili
BATHELWE othulini ngamaphoyisa ababili abebesolwa ngokubulala ngesihluku onogada eGoli.
OMnuz Lindokuhle Cebekhulu (24) noMbuyiselo Mthonti (26) badutshulwe izolo ezintatha eClermont, eThekwini.
Laba basolwa kushone elayizolo izithombe zabo sezigcwele ezinkundleni zokuxhumana, bebonakala begcwele igazi, komunye kuvela nezintambo okhalweni.
Komunye kuvele ne-tatoo esesandleni ebivela ngesikhathi abasolwa behlasela onogada eGoli ngesonto elidlule.
Laba abashonile kuvele ukuthi ngabaseNkandla.
Isolezwe lithole ukuthi emuva kwesigameko sokubulawa konogada ababili amaphoyisa aya eNkandla ethungatha abasolwa kodwa angabathola njengoba beze babulawa eClermont izolo.
Okhulumela amaphoyisa kuleli, uBrigadier Vishnu Naidoo uthe uphiko lwamaphoyisa oluphenya amacala ahleliwe eGoli, luhambisana namanye amaphoyisa nenkampani yonogada bathole ulwazi ngokuthi bacashephi abasolwa.
“Amaphoyisa adubule abesilisa ababili abebefunwa ngamacala okubulala onogada ababili eGoli ngeledlule.
Amaphoyisa athole ulwazi ngokuthi laba bacashe emjondolo yaseClermont. UCebekhulu noMthonti banqabile ukuboshwa, babe sebedutshulwa. Alikho iphoyisa elilimele kulesi sigameko,” kusho uNaidoo.
Onogada ababili babulawe ngo-Okthoba 10 ngesikhathi behlezi emotweni yomsebenzi, kwathathwa izibhamu zabo.
Konke lokhu kuhlaselwa kwabo kwaqoshwa kwivideo ebekwa ngaphakathi ezimotweni zonogada.
Kule video kwakubonakala abasolwa bebulala labo nogada maqede bagudluza kabuhlungu izidumbu zabo, befuna izibhamu.
Omunye wabasolwa kwakubonakala i-tatoo yakhe esandleni.
UNaidoo uthe lapho kubulawe khona abasolwa kutholwe isibhamu esizoya kohlolwa.
Imizamo yeSolezwe yokuthola imindeni yababulewe ayizange iphumelele izolo, izinamba zabo azitholakalanga.
Abantu abahlukene bebebhala ezinkundleni zokuxhumana ngalesi sigameko, abaningi bezwakalisa ukuncoma umsebenzi wamaphoyisa ngokubulawa kwabasolwa, abanye bekhala ngokuthi ngabe kungcono ukuba baboshiwe ukuze bezophendula ngabasolwa ngakho.