Iphini lemeya liphikela indodana yalo kwelokubulala owe-ANC

IPHINI leMeya kuMasipala waseMgungundlovu uNkk Thandiwe “Fucwana” Zungu liyayiphikela indodana yalo nalaba eboshwe nabo kubalwa nekhansela ukuthi ibona ababulala isishoshovu se-ANC eMoses Mabhida, uMnuz Msawakhe “Qashana” Mchunu.

Engxoxweni neSolezwe izolo ngemuva kokuthi iNkantolo yesiFunda yaseMgungundlovu ihlehlisele inamhlanje isicelo sebheyili sendodana yakhe uMnuz Gift Zungu, uNkk Zungu uthe bona njengomndeni abangabazi ukuthi akusiyo indodana yakhe nalabo eboshwe nabo ababulala uMchunu.

“Ukuhlala kwabo ejele noma kubuhlungu kodwa ekugcineni kuyovela ukuthi ngubani owabulala uQashana, siyafisa ukuthi uQashana njengesishoshovu anyakazise amathambo akhe aveze ukuthi ngubani owambulala ngempela,” kusho uNkk Zuma.

Okhulumela umndeni kaMchunu, uMnuz Phumlani Zuma ongumshana kamufi, izolo unqabile ukukhuluma neSolezwe wathi bacela ukungaphawuli okwamanje.

Abanye abasolwa ababoshwe nendodaba kaNkk Zungu, nguMnuz Nkosinathi Gambu ikhansela lakuward 10 kwaPata lapho kwakuhlala khona uMchunu, Mnuz Skhanyiso Zimu, Mnuz Sifiso Mbhele, Mnuz Mlungisi Zimu noMnuz Ayanda Ngubane.

Izolo bekulindeleke ukuthi kuqale ukulalelwa kwesicelo sebheyili sabasolwa kodwa kwahlehliselwa inamhlanje ngemuva kokuxoxisana kwabameli nombuso.

Isikhulu ophikweni lwezokushushisa esikhulume nabezindaba kodwa sacela ukungadalulwa sithe isizathu esidale ukuthi isicelo sebheyili singaqhubeki izolo ukuthi iMantshi ebisingethe leli cala phambilini uMnuz Ashin Singh ifake isimangalo esithi incwadi ebigunyaza ukuthi iphucwe icala ibingekho emthethweni. USingh wahoxa kuleli cala ngemuva kokusolwa ngokuthi ucheme nethimba labameli kulandela ukubonakala ekhuluma nalo ephaseji elithile khona enkantolo.