Ngeke batakulwe omasipala abafake imali eVBS: Mkhize
UNGQONGQOSHE wezokuBusa ngokuBambisana nezoMdabu, uDkt Zweli Mkhize uthi ngeke batakulwe wuhulumeni omasipala abatshala imali yabo eVBS Mutual Bank.
UMkhize usho lokhu izolo ehlangene namalungu ekomiti lezokuBusa ngokuBambisana nezoMdabu.
Uthe uma sekuqedwe uphenyo omasipala kufanele bathathele abatshala imali eVBS izinyathelo zomthetho ukuze babuyise leyo mali.
UMkhize uthe omasipala abatshala imali yabo eVBS bakwenza sebetsheliwe ukuthi akukho emthethweni.
Imali eyatshalwa womasipala eVBS kwakufanele yenze izidingo zomphakathi okubalwa ukuthuthukisa ingqalasizinda, ukukhokhela ugesi, amanzi nokunye.
Phakathi komasipala ababelondoloze imali eVBS kubalwa iVhembe, Fetakgomo Greater Tubatse Lepelle-Nkumpi, Limpopo 345 Dr Ruth Segomotso Mompat, Mafikeng, Ephraim, Mogale Makhado Madibeng Merefong, Elias Motsoaledi neDr JS Moroka.
Ibalelwa kuR1.8 billion imali elahleke eVBS Mutual Bank. Kuthiwa omasipala babetshale eyela kuR1.6 billion.
UMkhize uthe omasipala kufanele baqinisekise ukuthi bathola izindlela zokuvala isikhala esivuleke ngesikhathi kuyiswa imali eVBS.
“Abanye abasebenzi bomasipala babesisabisa ngokuthi bazosithathela izinyathelo zomthetho ngoba abakuboni okubi ngokutshala imali eVBS ngesikhathi sibakhuza. Kufanele iminyango yezokuBusa ngokuBambisana nezoMdabu ezifundazwe iqinisekise ukuthi kuyaphenywa bese labo abafaka imali eVBS bathathelwe izinyathelo,” kusho uMkhize.
Isazi somnotho, uMnuz Dawie Roodt we-Efficient Group, sithe izikhulu ezatshala imali eVBS kufanele zishushiswe noma ngabe sezisulile emsebenzini futhi kube nombandela wokuthi aziyibuyise imali ezayifaka kuleli bhange eliwile.
UMnuz Kevin Mileham okhulumela iDA kwezokuBusa ngokuBambisana nezoMdabu uthe bonke abafaka imali eVBS kufanele bakhokhiswe yona ngenkani futhi nabahlomulile ngokukhokhelwa “imali yokubabonga” mabayibuyise.
Uthe okubuhlungu wukuthi kwahlukumezeka abantu abawu-22 000 ababefake imali eVBS ngoba kuyibhange lomphakathi ababelithemba.