Asizibekile phansi isikole esinomlando
BAFUNA ukubuyisa ukuhlonipheka kwesikole saseThekwini esinomlando womzabalazo nesasakhelwe ukufundisa ababechithwe ngezinye izikole ngenxa yokuzibandakanya nomzabalazo ngesikhathi sobandlululo, iPhambili High.
Uthishanhloko wakulesi sikole esiseRossburgh , uMnuz Londa Luthuli osebe nguthishanhloko kusuka ngo2012 uthe bafisa ukubona lesi sikole sibuyela ekwaziweni njengesikole esingaletha umehluko emphakathini njengoba sasenza eminyakeni esakhiwa ngayo.
Uthe abantu abaningi abazi ukuthi lesi sikole sakhiwa ngezikhathi zobandlululo ngenhloso yokunika izingane zabantu ababebambe iqhaza ekulweni nobandlululo nezingane ezazizibandakanye nomzabalazo ithuba lokuthi zifunde.
ULuthuli uthe ezinye izingane zazixoshwa ezikoleni ezazifunda kuzona uma kutholakala ukuthi zizibandakanye nezomzabalazo, ezinye zazixoshwa uma kuvela ukuthi abazali bazo bayingxenye yomzabalazo.
“Uma uhulumeni wobandlululo uthola ukuthi uyingxenye yomzabalazo wawuxoshwa esikoleni noma kuvela ukuthi abazali bakho bazibandakanye emzabalazweni. Labo ababekwazi babeyisa izingane zabo koSwaziland nakwezinye izindawo ukuze ziqhubeke nokufunda kodwa labo ababengenawo amandla babengakwazi. Izishoshovu zomzabalazo uNkk Fatima Meer noNkk Florence Mkhize baya phesheya bayofuna uxhaso ukuze kwakhiwe lesi sikole ngenhloso yokunika lezo zingane ithuba lokufunda,” kusho uLuthuli.
Ngalezo zikhathi isikole sasinezinhlelo eziningi ezazihambelana nezidingo zabafundi okubalwa kuzo odokotela abelapha izifo ezithikameza umqondo ukusiza labo ababeyingxenye yokulwa nobandlululo bebe beseyizingane.
Ngalezo zikhathi lesi sikole sasingekho kuleli bhilidi esesikulona manje.
Uthe lesi sikole esisungulwe ngo-1986 asiqhelile kakhulu kulokhu esasikwenza ngalesiya sikhathi ngoba iningi lezingane ezifunda kusona zisuke zixoshwe kwezinye izikole ngezizathu ezahlukene.
ULuthuli obesuka esikoleni samabanga aphakeme esiseMlaza, iComtech lapho ebeyinhloko yomnyango ngaphambi kokuthi abe nguthishanhloko wasePhambili High uthe kwakunzima ngesikhathi eqala ukuzobamba lesi sikhundla kulesi sikole.
Uthe izingane zazingaziphethe ngendlela abafundi okufanele baziphathe ngayo kanti nesimo sesikole sasingesihle neze.
“Ezinye zezingane zethu zisuke zixoshwe kwezinye izikole – iPhambili kusuke sekuyindawo yokugcina abangayizama. Izingane zazingawugqoki ngendlela efanele umfaniswano wesikole, zazenza ezikuthandayo ngezinwele zazo. Wawuzwa noma zikhuluma ukuthi azikhulumisi neze okwabafundi. Nebhilidi lesikole lalimapeketwana kunanehlathi ngenxa yobuningi bezihlahla ezazinganakiwe. Ngafike ngabona ukuthi umsebenzi mningi ngangena kuwona ngokushesha,” kusho uLuthuli.
Uthe ezinye zezinto ezazibalulekile ukuthi azenze kwakukwenza isikole kube yisikole esingenza izingane zithande ukufunda kusona nokuthi othisha bathande ukufundisa kusona.
ULuthuli uthe akubanga lula ukuletha ushintsho njengoba ahlangabezana nezingqinamba ezahlukene okubalwa kuzo ukuvukelwa ngothisha abathile ababengahambisani noshintsho ayezoluletha nokwaholela ekutheni bayiswe kwezinye izikole labo thisha.
Ngaphandle kwalokhu uphinde wahlangabezana nenkinga yabantu abebehleli esikoleni ngodli sebephendule amakilasi amakamelo okulala. Abanye balaba sebekwazile ukuthi babakhiphe. Sekusele abane abasahleli ebhilidini eselisetshenziselwa ukufundisa uGrade 8 elingale komgwaqo.
U-matric wanyakenye walesi sikole uphase ngo 68% kanti uLuthuli unethemba lokuthi owalo nyaka uzokwenza kangcono kunalokhu.
Lesi sikole sisanda kuwina ijezi lebhola lezinyawo nele-netball elixhaswe ngabakwaCoca Cola Beverages South Africa neSolezwe.
Ngesikhathi ethula ijezi kubafundi bakulesi sikole uNksz Zama Majola ongamele ezokuxhumana kwiSolezwe utshele abafundi ukuthi Isolezwe nabakwaCCBSA babone kubalulekile ukuthi benze umncintiswano ozoklomelisa abafundi ngejezi lezemidlalo ngokugqugquzela abafundi ukuthi bafunde ngokuqonda bese bebhala indaba. Unxuse abafundi ukuthi baqhubeke nokufunda ngokuzimisela.
UMnuz Samukelo Nkosi wakwaCoca Cola Beverages South Africa ukhulume nabafundi ngokubaluleka kokuthatha amathuba avelayo nokuthi benze okufanele ngesikhathi esifanele.
“Kubalulekile ukuthi ungazibukeli phansi empilweni. Abantu abaphumelelayo abantu abathatha wonke amathuba avelayo. Qinisekisa ukuthi uyawathatha amathuba avelayo ngaso sonke isikhathi,” kusho uNkosi.
Umfundi owinele isikole sakhe ijezi, u-Athule Njongo (20) owenza uGrade 12 uthe ukubone kubalulekile ukuthi angenele lo mncintiswano ukuze isikole sibe negama elihle.