Bayivale ngomkhuleko eyezokuthutha
BAYIVALE ngomkhuleko inyanga yezokuthutha osomatekisi abasebenzela eDurban Station njengoba befuna ziphele izingozi zomgwaqo nokubulawa kwabantu emboninini yamatekisi.
UMnuz Bhekisisa Nzuza osekomitini ebelihlela lo mkhuleko uthe bakhethe ukuwenza njengoba sekuphela inyanga yokuthutha ngoba bafuna ukukhulekela ukuvala ukulimala kwabantu embonini yamatekisi, baphinde babonge nabagibeli ababasekayo.
“Umkhuleko wethu ngowokuthi sibuyisele kubagibeli bethu ngoba sizokhulekela ukuvala izingozi nokulinyazwa kwabafowethu esifuna kuphele. Siphinde sadla inyama nabagibeli bethu sabanika nezipho ezihlukene ngoba sifuna ukubabonga,” kusho uNzuza.
Uthe bonke ososeshini abasuka eDurban Station bebemelelekile kukhona nozakwabo babanye ososeshini namakhansela kaMasipala weTheku.
Uhlelo lo mkhuleko beluphethwe ngowayefunda izindaba emsakazweni Ukhozi, uMnuz Jabulani “Mjay” Sibisi othe osomatekisi babalulekile emphakathini futhi kuhle ukuthi bakhulekelwe ukuze umsebenzi wabo uhambe kahle ngaso sonke isikhathi.
UMnuz FM Fakude obemele usoseshini i-A Rank eMpangeni, uthe kubalulekile ukuthi kukhulekwe ngoba lo msebenzi wabo bawuphiwa wuNkulunkulu akekho umuntu ofundile oweza nawo.
“Siqale ukuthutha abantu kusewuR2 ngama-1970’s. Sasincintisana nesitimela sona esasibiza uR1.50 engakabi khona amarenke. Senza isivumelwano sokusebenzisana, nabanikazi bomsebenzi eDurban Station sakhula kanjalo. Ngiyabonga ukuthi bahlele lo mkhuleko ngoba kufanele siwuphathe kahle umsebenzi wethu siqinisekise ukuthi izizukulwane ezizayo ziphila ngawo,” kusho uFakude.
UMnuz Musa Dlamini oyikhansela laku-ward 26 uthe bayajabula ukuthi imboni yamatekisi ibuyisela emphakathini ngoba ngaphandle komkhuleko iphinde yanikela kubantu.
Ugqugquzele osomatekisi ukuthi bangene nasembonini yezasolwandle babe nemikhumbi bangene nasohlelweni lwamabhasi njengoba iTheku lithuthuka.