Kugxekwa abaqashi ababulala abasebenzi
IZINKANTOLO kumele zenze okwengeziwe ukuvikela abasebenzi kubaqashi abakhohlakele ababulala abasebenzi.
Lokhu kushiwo yiCosatu ngemuva kokuvakashela imindeni yabasebenzi ababili okuthiwa bashiswa umqashi ngophethroli bashona, ebasola ngokweba u-gearbox.
Isitatimende esithunyelwe yiCosatu kwabezindaba sithi ngemuva kwemibiko yokuthi abasebenzi ababili bashiswa ngophethroli bashona.
“Abanye abaqashi bayababulala abasebenzi, bangajeziswa ngezenzo zabo ezikhombisa ubulwane kodwa abasebenzi abenze amacala amancane kubaqashi bayaboshwa bagwetshwe ngalawo macala.”
Siqhuba sithi kunabasebenzi abaphoqwa abaqashi ukuthi basebenze emagcekeni emizi yabo bebe bengaqashelwe lokho, kuthi uma bekhala ngalokho babukwe njengabantu abangaqondi ukuthi kuleli kunenkinga yemisebenzi.
Lesi sitatimende siqhuba sithi abanye osomabhizinisi abancane abawuqondi umthetho olawula abasebenzi iLabour Relations Act. Ithe noMnyango wezaBasebenzi nawo awubanakile abasebenzi abasebenza ezinkampanini ezincane.
ICosatu ithi imindeni yabafi iswele ayinayo imali yokungcwaba ngakolunye uhlangothi iyazi ukuthi abaqashi bazoqasha abameli abasezingeni eliphezulu. “Yize kunjalo sinxusa iziphathimandla ukuthi zibhekelele impilo yabampofu kuqala,” sisho kanje.
Lo mfelandawonye wezinyunyana uthi usazoqhubeka nemikhankaso ekhuthaza ukuthi kube nokuphepha ezindaweni zokusebenza, izindawo zokusebenza zingaphenduki izindawo zokubulala abasebenzi.