Akuyona into embi ukufeyila uma usungula ibhizinisi
SIKHULA NGOMNOTHO
IMIYALEZO eqhamuka ezinhlakeni zikahulumeni, osopolitiki nosolwazi bezomnotho igcizelela ukubaluleka kwamabhizinisi amancane ukuthuthukisa umnotho.
Uhlelo lomnotho lukahulumeni iNational Development Plan (NDP) lunombono wokuthi ngonyaka ka-2030 imisebenzi eminingi iyovela kuwona amabhizinisi amancane.
Yize abanye bethi lolu hlelo luyagagamela ukulindela u-90% wemisebenzi emabhizinisini amancane kodwa nawo amabhizinisi amakhulu abonakala ethwele kanzima njengoba ediliza abasebenzi.
Isibalo esiphezulu sabantu abangasebenzi sibeka ingcindezi emnothweni. Amabhizinisi amancane abonakala eyisixazululo enkingeni yokungaqashwa kwabantu.
Inkinga ukuthi ubani ozoqala ibhizinisi aqashe abanye. Kuyiqiniso impela ukuthi kungcono ukuzisebenzela kunokusebenzela omunye umuntu. Uma ulalela osomabhizinisi asebephumelele uzwa amagongxigingxi abadlule kuwona ubone ukuthi kunzima. Labo abahehwa ongcamngce basheshe baphele amandla.
Enye inkinga ukuthi isibalo esikhulu, cishe u-80% wamabhizinisi asungulwayo awuyiqedi iminyaka emibili. Kuvame ukuthi labo abaphumelelayo kube wukuthi sebevuke othulini kaningi. Kufanele libe segazini kuwena ibhizinisi ukuze uwe uphinde uvuke uzithathe. Ngisho noma selihamba kahle ibhizinisi kufanele uhlale uqaphile ngoba ngokuphazima kweso ungabona sekushabalele konke.
Kosisiza ukuthi sihlukanise izindlela ezimbili ezilandelwa abantu ukusungula ibhizinisi ukuze sithole impendulo. Okokuqala abantu baqala ibhizinisi belandela abanye asebephumelele.
Singabala amabhizinisi afana neziphaza, amatekisi, oshisanyama avame ukuqalwa kulandelwa abanye abantu. Njengoba anda amabhizinisi afanayo kodwa bengandi abantu kusho ukuncipha kwamakhasimende nenzuzo. Le nzuzo encane ifaka ingcindezi kula mabhizinisi asafufusa okwenza aphelelwe umoya. Kuba yilawo amabili amathathu asuke esihlelele isimo akwazi ukuma agcine esimeme.
Amanye ala mabhizinisi asimamayo asuke enezindlela ezingcono zokwenza izinto. Isibonelo esivamile ukufika kwesitolo esisha esinamanani aphansi, lokhu kuphoqa izitolo ezindala ukuthi zehlise amanani. Inhloso yazo ukubamba amakhasimende ngisho ingekho inzuzo ngethemba lokuthi umafikizolo uzokhathala aqumbeke phansi. Kufanele uyilindele le mpi njalo uma kunombango.
Indlela yesibili ukuqala ibhizinisi elihlukile noma elingekho endaweni. Lapha ithemba ukuthi akekho umuntu ozoncintisana naye okusho ukuthi konke kuzohamba kahle. Imvamisa akubi njalo njengoba nayo le ndlela inezingqinamba zayo. Okokuqala kufanele uthole amakhasimende amasha ngoba akukho lapho uzowathatha khona. Lokhu kusho ukuthi kufanele abantu balibone liwusizo ibhizinisi lakho.
Ukuguqula abantu babone into entsha akulula. Uma ungenayo imali eyenele yokukhangisa nokufundisa abantu ngebhizinisi lakho uzithola usenkingeni ugcine usuvalile.
Ukuze uphumelele kuzona zombili lezi zindlela zokuqala ibhizinisi udinga imali. Ngaphezulu kwalokho kufanele ube namasu aphusile.
Umbuzo okufanele uwuphendule nsuku zonke wukuthi kungani abantu bezothenga kuwena bayeke amanye amabhizinisi?
Ngamanye amazwi yini le engcono oza nayo kunabanye? Awugcini nje ngokuziphendula wena, kufanele ubuze abantu izidingo zabo nokuthi ziyafezeka yini. Ungalinge uqale ungalwenzanga ucwaningo lokuthi abantu bayalidinga yini ibhizinisi lakho. Ungacabangi futhi ukuthi abantu benelisekile ngebhizinisi lakho ngaphandle kokuhlala ngokubabuza.
Siyabadinga impela osomabhizinisi abazositakula kule nkinga yokuntuleka kwemisebenzi. Kodwa asidingi abantu abantekenteke abangakwazi ukumelana nezimo ezinzima. Labo abazethembayo kufanele bathi becabanga impumelelo bakulindele ukufeyila.
Akuyona-ke into embi ukufeyila ebhizinisini uma nje uzofunda bese wenza kangcono. Okusemqoka ukuthi ungadikibali uphonse ithawula, kepha kumele ucubungule izinyathelo zakho ubuye ngomfutho omkhulu. Kuyasiza futhi ukuxoxa ngezingqinamba obhekene nazo ucobelelane ngolwazi nabanye.
Lude ukhalo oluya ekunethezekeni kwezamabhizinisi, qiniseka ukuthi uyilungele indlela. Khetha ibutho ozohamba nalo ngoba uzobadinga abantu ozoncika kubona ngezikhathi zemvula nezivunguvungu.
Ukhumbule ukuthi akuyona impi yakho wedwa le kepha yimpi yabo bonke abamnyama futhi kumele siyinqobe. Ayihlome ihlasele.
Sishayele noma uthumele umlayezo ku 060 586 9798 noma ku-083 354 8794. Bhalisa uthole ulwazi olunohlonze ku www.ubuntuwealth.co.za. Hheshe!