Ngiyobona ebhokisini ukuthi ngivotela bani
MHLELI: Njengomvoti obejwayele ukuvotela uKhongolose kubukeka ngingeke ngizixake ngokuwuvotela. Hhayi ukuthi ngeke ngivote, ngizovota kodwa ngiyobona ebhokisini ukuthi ngivota kanjani. Angikusho lokhu mhleli nabafundi ukuthi izinkinga zangaphakathi embuthweni wethu kubukeka besazozalwa abazozilungisa. Hhayi cha abaholi bethu bayakwazi ukufihla into evele obala njengesinqa sesele.
Kunento abaholi be-ANC kulesi sifundazweni abayikhohlwayo, abanye bakhona ezigungwini zezifunda kodwa abazi ukuthi kulesi sifundazwe kwake kwacanasa obaba uLionel Mtshali noMntwana waKwaPhindangene, sisaphethwe iNkatha. Iphutha elikhulu abalikhohlwayo abaholi bethu leli, MHLELI: Ngithi angidlulise ulwazi okugqamayo ukuthi baningi lubabalekele oluthi “wonke umuntu olapha emhlabeni kaNkulunkulu ungokaNkulunkulu”.
Kuyagqama indlela umuntu afa ngayo usuku nosuku kuleli zwe baningi abangakuqondi lokho, abakunakile futhi uyabona abanendaba. Bathi akuqhubeke uma kuqhubeka kwande uma kwanda, umuntu usho kanjalo nje uyalibala ukuthi kuza kuye ngqo noma elungwini lomndeni wakhe.
Kodwa bantu bakuleli lizosilimaza ngonyaka ozayo liphinde lisilimaze ngo-2021.
Sibe nethemba emuva kwengqungquthela yangoDisemba ukuthi abaholi bakazwelonke bazodilika bezolungisa isifundazwe kodwa angikuboni kwenzeka.
Izinkinga ezikhona sesikhathele ukuzibalula. Ngicabanga ukuthi izintatheli zasesifundazweni sezikhathele ukubhala ngokuncishwa kwamalungu omphakathi ubulungu be-ANC.
Sihle Zikalala nawe Nobhala Mdumiseni Ntuli, niyabona yini ukuthi into eyenzeke ngo-2016, silahlekelwa abavoti, ngonyaka ozayo bazolahleka kakhulu?
Njengoba ngibhala lapha ingoba ngiyazi uma ngingase nginibhalele ngalezi zinto ngeke nilungise, kunalokho nizozama ukuthi nimbambathe ekubeni inhloso yami ngifuna nivuke. Izinkinga ezinkulu zisemasebeni azikho ezifundeni.
Amaqabane awabhekani, kuyaliwa abanye basavalelwa ngaphandle abanye kuthiwa abasiwo amalungu. Bazoba kanjani amalungu nibaphuca ubulungu? Laba bantu enibajahayo nilindele ukuthi bazovotela uKhongolose ngonyaka ozayo? Njengoba amakhansela exosha abantu ematohweni nilindele ukuthi labo bantu bavotele uKhongolose? Njengoba umphakathi ungaqashwa nilindele ukuthi uzophinde ukhohliseke ngonyaka ozayo?
Ukufa kombutho kulele esigungwini sesifundazwe, kumele baphume emihlanganweni beze phansi emasebeni. Okhathazekile ETHEKWINI