Ayikho inkinga ngokujola kwabazalwane
AKUSONA isono ukufundana kwabathandanayo abakholwayo kodwa inkinga wukulala bengashadile.
Lokhu kushiwo nguMfundisi Siboniso Mngomezulu ongumbhali wencwadi ethi, ‘The Batle In The Mind’ ekhuluma ngobudlelwano nokungena emshadweni. UMngomezulu, ongumeluleki ongumfundisi we-AFM His Worship Centre, uthi akunasici ukufundana, phecelezi okubizwa ngeChristian Dating kodwa okusadida abaningi. Uthe emasontweni amaningi kufundiswa ukuthi abazalwane akumele bafundane kodwa kumele bashade kuphela.
“Akukho eBhayibhelini ukuthi akumele abazalwane bajole kodwa licacisa ngokuthi akuyiwa ocansini kungashadiwe. Kumele ngabe yilokhu okufundiswa emasontweni bese kuba kumuntu ukuthi ufuna ukuthatha siphi isinqumo,”echaza.
UMngomezulu uthe ukufundana kubazalwane kusiza ukuthi bangashadi bengazani nhlobo. Ugcizelela ukuthi uma befundana kumele kwazi abadala ukuze babagade, babaluleke. Uveza nokuthi lokhu kufundana akwenziwa kunoma ngobani kodwa wokwabalungiselela ukushada.
“Umehluko ngeChristian Dating ukuthi akujolwa nje into engaziwa ukuthi iyaphi. Kuyasiza uma abantu befundana kwaziwe ngoba nabo bayaziqoqa. Inselelo eyenza ukuthi abanye bagcine bengakufuni nhlobo ukufundana esontweni ukuthi abanye bayeqa, baphule umgomo,” kusho uMngomezulu.
Mayelana nesikhathi sokufundana, uthe kunzima ukukalela abantu kodwa okungenani akumele kuphele iminyaka emibili bengashadile.
UDkt Mduduzi Mdletshe ongumeluleki usanda kukhuluma ohlelweni lwangeSonto lweVibe FM ngalesi sihloko. Uthe amasonto amaningi akuveza sengathi kuyisono ukujola ngoba evikela abazalwane ukuthi bangangeni esonweni.
Isolezwe lithole ukuthi kwamanye amasonto ayifihlwa indaba yeChristian Dating, kwazi ngisho abaphathi uma kukhona abafundanayo. Sekukhona amawebsite namakhasi ezinkundla zokuxhumana ahlanganisa amakholwa afuna ukujola. Enye yayo yi-Elite Singles ekhasini layo ithi ukufundana kwabazalwane kunciphisa amadivosi. Kuvela nokuthi okwenza bahlanganise abazalwane abafuna ukujola ukuthi kulula ukuthola umuntu onezinkolelo ezifanayo ukuze kube lula nasemshadweni.