Libhekisa amabombo e-Uruguay elesizwe
UMTHWALO usobhokweni eqenjini lamantombazane lesizwe labaneminyaka engaphansi kuka-17 njengoba ngempelasonto bezobhekisa amabombo e-Uruguay kwiNdebe yoMhlaba.
Njengamanje Abantwana basekhempini ezophela ngoLwesihlanu lapho umqeqeshi, uSimphiwe Dludlu, ezobe esememezela abadlali abawu-21 azohamba nabo ngoMgqibelo.
Umqhudelwano uzoqala ngoNovemba 13 kuya kuDisemba 1.
“Yize singakawazi amaqembu kodwa sihlela ukuthi sibe nemidlalo emibili yobungani e-Uruguay esizozijwayeza ngawo isimo sezulu ngaphambi komdlalo wethu wokuqala neMexico,” kusho uDludlu.
Amanye amazwe aseqoqweni laBantwana yiBrazil neJapan.
Kulandwe uThabo Senong ukuthi azolekelela uDludlu nephini lakhe uMaud Khumalo emqhudelwaneni.
USenong ubekwiNdebe yoMhlaba neqembu labafana likaUnder 20 eSouth Korea nyakenye.
“Sinobudlelwano obuhle (benoKhumalo) futhi siyakholwa wukuthi ngokubambisana kukhona esingakuzuza. Umqeqeshi uThabo yena ungomunye wengibukela kubona nengikholwa wukuthi sinethimba elihle labaqeqeshi,” kusho uDludlu.
Kungokwesibili emlandweni wakuleli ukuthi amantombazane ka-Under 17 aye kwiNdebe yoMhlaba. Aya okokuqala ngo-2010 eTrinidad & Tobago ngaphansi kobuholi bukaSolly Luvhango. Nokho iqembu alinqobanga nowodwa umdlalo liphuma esigabeni samaqoqo.
UDludlu uthe yize engabhekile izinto ezinkulu kodwa bazimisele ngokuthola amaphuzu emidlalweni yabo.
“Ngifuna abadlali bakuthokozele ukudlala. Kumele bakhombise ithalente labo kodwa futhi sibhekile ukuthi bazikhandle ngokuphindiwe ukutshengisa ukuthi bakulungele ukudlala ezingeni lomhlaba. Kusemqoka ukuzikhombisa ukuthi besikufanele ukungena (kwiNdebe yoMhlaba), senze konke okusemandleni ukuze sithole amaphuzu. Yiwona azokucacisa ukuthi asibeka kuphi,” kusho uDludlu ekhuluma nabe-safa.net.