USolinas nesizathu sokungamdlalisi u-Itu
UMQEQESHI weKaizer Chiefs, uGiovanni Solinas, ucacise ngesinqumo sakhe sokuhlalisa ebhentshini ukaputeni waMakhosi u-Itumeleng Khune.
Bekuvimbe uVirgil Vries ngesikhathi iChiefs ihlula iBlack Leopards kumaphenathi kwiTelkom Knockout Last 16 ngeSonto.
Lo nozinti waseNamibia, uvimbe amaphenathi amabili bagcina benqobe ngo 4-2 kulo mdlalo obuseFNB Stadium obuphele zibambene ngo 1-1 ngemuva kwemizuzu ewu-120. Nangesikhathi kuqhubeka umdlalo uvimbe amabhola amabi abengaweza ngelibanzi iLeopards.
Ngesizini edlule ngaphansi kukaSteve Komphela uKhune ubezitamuzela ijezi, nokugcine kuholela ekutheni unozinti uBrilliant Khuzwayo enqabe ukuvuselela inkontileka ethi ufuna ukuya lapho ezodlala khona. Ugcine esayiniswe yi-Orlando Pirates nokho wafika walimala sekuqala isizini.
UVries usayiniswe kule sizini ukuthi azoba yiphini likaKhune ngemuva kokuchithwa yiBaroka FC. Phambilini lo nozinti uvimbe kwiMaritzburg United nakwiLamontville Golden Arrows. “Yinto eyenziwayo ukushintshwa konozinti. U-Itu ungunozinti wethu wokuqala kanjalo nakwiBafana kodwa manje sizoqala imidlalo eminingi njengoba kuza nemidlalo yaseAfrika, eyemikhumulajezi neligi. Kwesinye isikhathi kuhle ukuphumuza unozinti. Ngisho uGianluigi Buffon uyaphunyuzwa kwiJuventus, kungani kungafanele kube njalo naku-Itu? Kodwa sinonozinti ababili abahle abasezingeni lomhlaba. Ngiwubukile umdlalo weBafana neSeychelles (wesibili) uKhune ube nomdlalo omuhle. Ngiwubukile noweNamibia, uVries naye udlale kahle. Ayisiqwashisi ebusuku indawo yonozinti eqenjini lethu ngoba noBruce (Bvuma) udlale kahle kwiMacufe,” kusho uSolinas.
Inkulumo kaSolinas ikubeka kucace ukuthi ngempelasonto kowabakhaya baseSoweto uzobuyisa uKhune ezintini.
IChiefs izovakashela izimbangi i-Orlando Pirates emdlalweni we-Absa Premiership ngoMgqibelo eFNB Stadium ngo3.30 ntambama.
Amathikithi alo mdlalo asedayiswe aphela. Kulindeleke ukuthi kushunqe uthuli njengoba amaqembu ehlukaniswe amaphuzu amabili kwi-log. IPirates isendaweni yesibili kuthi iChiefs ibe kweyesithathu ngamaphuzu awu-14.
Egcina ukuhlangana la maqembu ngoMashi, eZimnyama zadlula ngo 3-1 ngegoli kaThembinkosi Lorch namabili kaLuvuyo Memela.
EleChiefs lashaywa uLeonardo Castro, uSolinas aveze ukuthi uthemba ukuthi kuzoshaya usuku lomdlalo eseluleme ngokugcwele.
Imidlalo ye-Absa Premiership:
Namuhla: Free State Stars v Lamontville Golden Arrows (Goble Park Stadium, 7.30pm)
NgoLwesihlanu: Bidvest Wits v Highlands Park (Bidvest Stadium, 8pm)
NgoMgqibelo: Orlando Pirates v Kaizer Chiefs (FNB Stadium, 3.30pm); Polokwane City v Maritzburg United (New Peter Mokaba Stadium, 3.30pm); Cape Town City v AmaZulu FC (Cape Town Stadium, 8.15pm); Chippa United v Mamelodi Sundowns (Sisa Dukashe Stadium, 8.15pm)
NgeSonto: Black Leoapards v Free States Stars (New Peter Mokaba Stadium, 3.30pm); SuperSport United v Lamontville Golden Arrows (Lucas Moripe Stadium, 3.30pm); Bloemfontein Celtic v Baroka FC (Dr Molemela Stadium, 3.30pm)