IBIZWA NGANI LE NTO NGEMPELA?
ANGAZI noma yishwa leli, noma ukuthathana kancane okanye yindelelo nje engadinge kuchazwa.
UFaouzi Benzarti, obeqeqesha iTunisia, uyoyixoxela amagwababa echobana indaba yakhe nenhlangano eyengamele ibhola kuleliya lizwe.
Phela lo mqeqeshi uvele waxoshwa eqenjini lesizwe ngemuva kokuhlungela ngempumelelo umqhudelwano i-Africa Cup of Nations (Afcon). ITunisia ishaye iNiger ngo 2-1 ngeledlule, yazibekisela indawo eCameroon, kwi-Afcon yangonyaka ozayo.
Ukwenza lokhu nje uBenzarti uthathe izintambo kukubi kwiTunisia, kusanda kushiya uNabil Maaloul oshiye kwiCarthage Eagles ngemuva kweNdebe yoMhlaba.
Esesebenze kanzima kunjalo uBenzarti, bamchithile abaphethe ibhola eTunisia, futhi bengaqali. Bese kungokwesithathu bemxosha kulesi sikhundla!
Esitatimendeni esikhishwe yiTunisa Football Federation (TFF) kuvele ukuthi: “Ibhodi eyengamele ibhola eTunisia, ithathe isinqumo ngoMgqibelo, sokuthi siqede ubudlelwano nomqeqeshi weqembu lesizwe uFaouzi Benzartui”.
Simthusile lesi sinqumo uPotshoza, ngoba phela uBenzarti ubeqashwe ngoJulayi nonyaka.
“Ibuhlungu lento abayenza kimina, bayenza ngoba nakhu ngingowokudabuka khona lapha eTunisisa, bebengeke beyenze ukube ngingowangaphandle. Ngishiye yonke into phansi, ngasiza izwe lami ebelingidinga. Nemiphumela yami iyazikhulumela. Impela lokhu abakwenze kimina akukuhle neze,” usho kanje uBenzarti.