UPule akumethusi ukuba yintandokazi yabalandeli
AKUMETHUSI ukuphenduka intandokazi yabalandeli be-Orlando Pirates ngokushesha, uVincent Pule, ophupha ngokushaya into ecokeme emdlalweni wabakhaya ngoMgqibelo.
I-Pirates izokwamukela iKaizer Chiefs emdlalweni we-Absa Premiership wabakhaya baseSoweto eFNB Stadium, eNaserc, ngoMgqibelo ngo-3.30 ntambama. Womabili la maqembu ayiwinile imidlalo yangempelasonto nokungabuzwa ukuthi kuzonyusa ukuzethemba nakubadlali. IChiefs ikhiphe iBlack Leopards kwiTelkom Knockout kwathi iPirates yagudluza iChippa United.
UPule, obeyibamba kwiBidvest Wits ngesizini edlule, ungene esiwombeni sesibili, washayela iPirates igoli lokuwina. Emasontweni edlule kweZimnyama uqokwe njengomdlali wenyanga uSepthemba ovotelwa ngabalandeli waphinda wemuka nomklomelo wegoli elivelele. “Angimangali ukuthi abalandeli bePirates bayangithanda. Njengoba ngasho ngaphambi kokuqala kwesizini, ukusebenza kanzima kunomvuzo. Uma usebenza kanzima zonke izinto ziyeza kuwena,” kusho uPule.
Amathikithi owobakhaya adayiswe aphela nokusho ukuthi uPule uzodlala okokuqala enkundleni egcwele. Kungenzeka abhekane nobunzima kubalandeli beChiefs kwazise bekuvele ukuthi uzosayina eNaturena kodwa wagcina eqoke eZimnyama.
Nokho umlando uyakuveza ukuthi abadlali abashaye into ecokeme kowabakhaya, kukhulunywa ngabo isikhathi eside ebholeni laseMzansi. Ngakolunye uhlangothi, abashaye into ephansi, kuthatha isikhathi ukuthi baxolelwe ngabalandeli.
“Abalandeli bePirates kufanele basigqugquzele. Ngifuna ukubona iqembu lidlala kahle, ngendlela yePirates. Ngiyazi ukuthi bafuna ukuwina ngaso sonke isikhathi. Singabadlali sihlala senza konke okusemandleni kodwa kwesinye isikhathi akwenzeki ngoba yibhola leli. Abalandeli kufanele bakuqonde ukuthi akuhlali kukuhle ngaso sonke isikhathi. Kufanele baseseke, bengasihhahhamezi ngoba uma singena enkundleni sifuna iqembu liwine, sifuna ukwenza ngakho konke ukuze liphumelele. Uma beseseka umfutho uyenyuka,” kusho uPule.
Okwenza lo mdlalo wabakhaya uhlabahlose ukuthi womabili amaqembu asefomini kulezi zinsuku. Ngaphandle kwalokho kunabadlali nhlangothi zombili okubhekwe ukuthi bathwale amaqembu abo. KwiChiefs kubhekwe uKhama Billiat, Dumisani Zuma, Siphelele Ntshangase nabanye. KwiPirates kubhekwe uPule, Xola Mlambo, Thembinkosi Lorch nabanye.
“Lona wumdlalo omkhulu kimina nakithina sonke siyiqembu. Ngikhule ngiwabuka la maqembu edlala. Empeleni kungasho ukufezeka kwephupho kimina uma ngithola ithuba lokudlala ngoMgqibelo. Kwenyuse ukuzethemba kimina ukushaya igoli koweChippa. Ngibheke ukubona iqembu lenza kahle,” kusho uPule.