Kabezwa mshini ngeCurrie Cup abeSharks
AKAFUNI nokuyikhuluma eyokwehlulwa kwabo kowamanqamu ngesizini edlule uS’bu Nkosi ogijima ophikweni kwiCell C Sharks.
UNkosi uthe isicanase kwenela iWestern Province abazotholana nayo kowamanqamu ngoMgqibelo emqhudelwaneni iCurrie Cup.
Lo mdlalo okulindeleke ukuthi uhlukanise iNingizimu Afrika phakathi, uzodlalelwa eNewlands Stadium eKapa, kanti uzoqala ngo-4 ntambama. ISharks ishaye iXerox Lions ngo 33-24 kowandulela owamanqamu ngeledlule, kwathi iProvince yaphunyuka sekuvalwe amehlo ishaya iBlue Bulls ngo 35-32, esikhathini esengeziwe.
OShaka bazikhotha amanxeba kulandela ukushaywa kwabo kabuhlungu yiqembu elifanayo, kowamanqamu ngesizini edlule. Okwenza kube buhlungu kakhulu kubadlali beSharks ukuthi bashayelwa ekhaya ngo 33-21.
Izolo ngesikhathi iqembu liziqeqesha, eKings Park Stadium, uNkosi uthe akayizwa eyokuthi iProvince iyizimfivilithi ekunqobeni lesi sicoco kulandelana.
“Angifuni nokuyizwa leyo nto. Nathi siyasifuna lesi sicoco, ngokwami siyefana njengoba sizodlala sobabili neProvince kowamanqamu. Sifuna ukuthi lapho sesibuya ngebhanoyi, sibe sihleka sodwa ngoba sifuna ukubuya naso lesi sicoco,” usho kanje uNkosi obumbona ngisho ebusweni ukuthi ukulambele ukunqoba lesi sicoco.
Ebuzwa ukuthi yikuphi okungamjabulisa kakhulu ngokunqoba isicoco seCurrie Cup, uNkosi uthe: “Kunabantu abasebenza kanzima eqenjini abangagqamile. Lapha ngibala izikhulu ezisebenza kanzima, umnyango wezemali nabanye abaningi abangalali benzela iqembu ukuthi liqhubekele phambili.
“Sekuyisikhathi sokuba iSharks yanqoba ngo 33-19.
“Angifuni ukukhuluma ngomlando ngoba sekwedlule. Unyaka omusha lona, futhi kuningi osekushintshile. Okwethu sifuna ukuthi sidlale kahle, sinqobe kwaphela nje,” kuqhuba uNkosi.
Umdlalo wamanqamu uzobe uphethwe ngunompempe uJaco Peyper. Kuzobe kuyihlandla lesine uPeyper edlalisa kowamanqamu kwiCurrie Cup eminyakeni eyisikhombisa.