U-Eymael nexhala ngowe-Arrows
UYABALISA ngokuzithambisa kwabadlali bakhe abathile umqeqeshi weFree State Stars, uLuc Eymael, ngaphambi komdlalo omqoka neLamontville Golden Arrows, kwi-Absa Premiership namuhla ngo-7.30 ebusuku eGoble Park, eBethlehem, eFree State.
Ngaphambi kokuthi ziye ekhefini lemidlalo yeFifa, iFree State iphumelele ukuqoqa amaphuzu amathathu okwesithathu kule sizini, imangaza omakhelwane bayo iBloemfontein Celtic. Lo mphumela ube muhle kwezika-Eymael kodwa lo mqeqeshi uyakhala ngokuthi kunabadlali athembele kubona abamenzela phansi.
Okungase kukhuthaze lo mqeqeshi waseBelgium ngaphambi komdlalo, ukuthi la mawini akhona kwiFree State, womathathu iwathole idlalela ekhaya. Lokhu kuchaza ukuthi i-Arrows kumele izibambe ziqine njengoba isanda kubhekana nobunzima idlala oweTelkom Knockout kade beduve ebhasini amahora ngenxa yengozi yomgwaqo.
Nabo Abafana Bes’thende beza lapha behambela phezulu kweyeligi ngoba bavale ngomphumela omuhle lapho beshaye khona ePrincess Magogo iBlack Leopards ngo 1-0 wegoli likaKnox Mutizwa. Okuzokwenza uClinton Larsen aye emdlalweni enethemba ukuthi kusukela isizini iqalile mithathu imidlalo esidlalwe yi-Arrows, yangangenelwa yigoli. Nasekuhambeni i-Arrows yilapho ingcono khona kwazise kowokugcina ewudlale ingekho ekhaya ibambane ne-Orlando Pirates ngo 0-0 e-Orlando Stadium, eSoweto.
“Kule sizini abadlali bami sebekukhombise kaningi ukuthi uma bengazinikela ngendlela elindelekile singaba yinkinga emaqenjini amaningi. Siyiqembu eliyingozi uma sidonsa sonke kodwa manje inkinga ukuthi lokho akwenzeki okwamanje. Ngeke kwaphikwa ukuthi uma sidonsa sibhekise ezindaweni ezahlukene ngeke siyithole imiphumela esiyibhekile,” kusho u-Eymael.
Esesonga u-Eymael ukhumbuze abadlali bakhe ukuthi balona iqembu elinabadlali abagqamile, amandla abo alele ekutheni wonke umuntu azinikele kumbe azimisele ngakho konke anakho.
“Ngeke siphumelele ngabadlali abayisipesheli njengoba kwenzeka kwamanye amaqembu ngoba thina asinabo labo badlali abanjalo.
Sikholelwa ekutheni sisebenze njengeqembu, sihloniphe isitha bese siqinisekisa ukuthi ibheji lethu lihlale lihloniphekile. Asinabo oMessi (Lionel) kumbe uCristiano (Ronaldo).
Ukungabi nabo abadlali abafana nalaba kusho ukuthi siphoqelekile ukusebenzisana ngokubambisana sonke.
Inkinga manje wukuthi bambalwa abadlali abenza lokho kodwa abanye bazenzela okwabo nje.”
Kusukela ngo-2000/2001 la maqembu asebhekane amahlandla awu-26. I-Arrows isaphumelele ukunqoba eyisikhombisa yaleyo midlalo, kwathi iFree State yanqoba eyishumi. Imidlalo eyisishiyagalolunye iphele ngokuthi zicazelane amaphuzu.