UManyonga ukwabayishumi abavelele
UKUQOKWA kukaLuvo Manyonga emunxeni wabesilisa abakhiphe unyawo kwezokusubatha kulo nyaka, kufana nomayihlonze womgqigqo walo mdlali selokhu alwa nedimoni lezidakamizwa.
UManyonga oyibamba kwilong jump ubalwe yinhlangano eyengamele ezokugijima emhlabeni i-International Association of Athletics Federations (IAAF), kwabayishumi okuzokhethwa kubona umdlali wesilisa ovelele kulo nyaka.
Umcimbi wokumemezela abadle umhlanganiso useMonaco ngoDisemba 4 kanti amavoti azovalwa ngoNovemba 13.
Uvota ngokuya ekhasini le-@iaaforg kwiTwitter bese u-retwitter lowo ohamba naye. La mavoti azohlanganiswa nawesigungu se-IAAF ukukhipha abawinile. Ukumenyezelwa kukaManyonga ngoLwesibili kulandela okukaCaster Semenya omenyezelwe kwabesifazane ngoMsombuluko.
UManyonga uzakhele ugazi negama etholela iNingizimu Afrika indondo yesiliva kuma-Olympic eBrazil ngo-2016. Ulandelise ngokudla ubhedu ethola igolide ngonyaka olandelayo kwi-IAAF World Champs. Khona nyakenye uphinde wabashaya emakhanda kwi-IAAF Diamond League. Kulo nyaka uvikele isicoco sakhe seDiamond League, wathola isiliva kwi-World Indoor kanjalo nakwiAfrican Championship. Yonke le mpumelelo ilandele ukuvuka azithathe ngemuva kokuqeda isigwebo sakhe sokutholakala ne-tik egazini ngo-2012.
Nyakenye isicoco somhlaba sihambe nomdlali we-high jump waseQatar uMutaz Essa Barshim obengekho emiqhudelwaneni kulo nyaka ngenxa yokulimala. Kulo nyaka umbango ushubile njengoba kuqokwe nomgijimi waseKenya u-Eluid Kipchoge ophule irekhodi lomhlaba kwi-42km enqoba iBerlin Marathon. Ubuye abe ngumpetha weLondon Marathon.
Kukhona abakhaya bakhe u-Emmanuel Korir ongumpetha weContinental Cup futhi onesikhathi esihamba phambili emhlabeni kwi-800m. Omunye okhona uTimonthy Cheruiyot ongumpetha weDiamond League kwi-1500m.
Bazobanga nezibabuli zabagijimi base-USA uChristian Cole noNoah Lyles abayibamba kwi-100m.
UTomas Walsh waseNew Zealand ogila izimanga kwishot put uqokiwe. Ungumpetha we-World Indoor, Commonwealth Games neDiamond League. UKevin Meyer waseFrance ungumpetha we-hemptathlon kwi-Indoor futhi uphethe irekhodi lomhlaba kwi-decathlon, bese kuba u-Abderrahman Samba waseQatar ongumpetha weContinental Cup ku-400mH.