Uke wayibamba nezingwazi uHHP ongasekho

Uberepha kakhulu ngolimi aluncela ebeleni, iSetswana. Waphothula uGrade 12 eSt Alban’s College, ePretoria.

Wake waba yilungu leqembu iVerbal Assasssins kwathi ngo-1997 yena nabangani bakhe bahlangana nophrojusa uChicco Twala owabaphrojusela i-albhamu eyayithi Party maqede iqembu labo lahlakazeka.

Ngemuva kwalokho uHHP wahlangana no-Isaac Mthethwa owamphrojusela icwecwe elalithi Introduction futhi elaliqukethe izingoma eziculwa ngezinhlamvu zezilimi zakuleli okuyisiSetswana, isiZulu neSesotho.

Ngo-2004 wakhipha i-albhamu eyayithi O Mang, eyayinenoni elalithi On My Own. NgoSepthemba 2007 wahlonishwa kumaMafikeng Golden Stars Awards eMmabatho Convention Centre.

Wabe esedla umhlanganiso emqhudelwaneni womdanso wonyawo lwempungushe, iStrictly Come Dancing, edansa noHayley Bennett.

Kwathi ngoDisemba 2007 wakhipha icwecwe elalithi Acceptance Speech, eyayinomucu owawuthi Music& Lights, owawune-video eyayinomculi weR&B u-Amerie. Ngo-2008 walingisa emdlalweni wethelevishini iRhythm City ngo-Ephreli 4, 2008.

NgoDisemba 2009, uHHP wabe esekhipha i-albhamu yesikhombisa iDumela ngaphambi kokuqopha ingoma noProverb benoTebogo Rameetse ethi Breadwinners.

Uke waqokwa kumaBET Award emunxeni weBest International Act ngo-2010 nakwiMTV Africa Music Award. U-HHP ubuye wethula uhlelo kuSABC 1 olwaluthi The Respect Show with HHP ngo-2010 futhi waba yinxusa leziqholo iStatus. Ucule ngokuhlanganyela nabaculi abaningi njengoRaheem DeVaugn, Soweto String Quartet, Jub Jub, Zakwe, Teargas, Pro, Caspper Nyovest nabanye.

Ugcine ukunandisa emcimbini wokumenyezelwa kwabaculi abawine kumaSatma Awards ngoSepthemba. Washadelwa ngo-2016 nomkakhe uLerato Sengadi. Waba nengane eyodwa uLeano, ayithola kuLerato Khanye. Udlule emhlabeni ngo-Okthoba 24, 2018 ngezithuba zabo-12 emini.