Ushayeke ekhanda wafa elamula amadodana
USALE ushaqekile umndeni nomphakathi waseTshekani, eMuden, ngaphandle kwaseGreytown kushona owesifazane (58) oshayeke kabi ekhanda kade elamula amadodana akhe akade elwa.
UNksz Mapharafini Mchunu oganele kaMyaka kuthiwa ushone ngoMsombuluko emuva kokuba eshayeke ekhanda ngenduku yegalofu.
Amadodana, angaboshiwe, kuthiwa abephuze kakhulu utshwala ebheme nensangu ngesikhathi ehilana.
Abe esethatha izinduku elwa. Unina ebona lokhu kuthiwa ungene phakathi kwawo ezama ukuwalamula wabe eseshayeka ngephutha.
Enye indodana elimale kabi esandleni, igcine ikhonkile.
Kuthiwa ngemuva kokushayeka unina uye kocambalala ngoba ekhala ngobuhlungu bekhanda wangabe esavuka.
Indodana kamufi endala ithe yenzekile ingozi.
“Mina bengiphuma emsebenzini ngafika ngatshelwa ukuthi umama ubelamula abafowethu ngesikhathi belwa kade bephuza utshwala. Umama ebebakhuza ngotshwala. Kade beshayana base beshaya umama ngephutha ngenduku yegalofu. Kuthiwa ulimale ekhanda wabe eseyocambalala kwase kutholakala ukuthi akasaphefumuli emuva kwesikhashana,” kusho indodana kamufi engathandanga ukuba igama lalo lidalulwe.
“Abafowethu kumele bezibonele umonakalo abawenzile ngoba umama ugcine ngokushona. Kumanje ngihamba amakhaza ngilungiselela umgcwabo. Kumele ngeSonto uma sesimngcwaba babone simfaka emgodini ukuthi umsebenzi wezandla zabo wonke lona. Kusithusile kakhulu okwenzekile futhi simangele impela ukuthi kuze kuphume isidumbu,” kusho indodana kamufi. Ilungu lomphakathi elingathanda ukudalulwa lithe udaba lukhulunyelwa phansi. “Okwenza sithuke thina njengomphakathi wukuthi yini amaphoyisa engababophi laba bafana ngoba bebeshayana kubuka wonke umuntu baze bashaya nonina. Ukufa kwakhe bekumele kuphenywe. Simangele sibabona begcwele igceke ekubeni unina elele emakhazeni.” THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.