Uzamile uMboweni kunzima: Izazi
IZAZI zomnotho zithi uzamile uNgqongqoshe wezeziMali omusha uMnuz Tito Mboweni, bekufanele eze nezinhlelo zokukhulisa umnotho njengoba izwe lilengela kwinzikamnotho.
UDkt Azar Jammine we-Econometrix uthe siyaphoxa isabelozimali sikaMboweni ngoba uhlululekile ukuza nohlelo lokwehlisa isikweletu sikahulumeni ngenxa yokuthi umnotho awukhuli kahle.
Uthe uyakhala ngokutakulwa kweSouth African Airways (SAA) ngoR5 billion nokuthi uhulumeni kufanele adayise ingxenye ethile yayo ukuze ikwazi ukwenza inzuzo.
“Yena uzamile ukusho izinto ezizojabulisa abantu ngoba ubenomsebenzi onzima kodwa akucaci ukuthi isikweletu sezwe uzosehlisa kanjani.
Akakwazanga nokukhuza abasebenzi bakahulumeni ngokufuna ukunyuselwa amaholo ngokweqile kodwa-ke mhlawumbe lokhu ubekwenzela ukuthi kusayiwa okhethweni nenhlangano yakhe izodinga amavoti. Ngiyasaba ukuthi izinhlangano eziklelisa amazwe ngomnotho zingase zisifake kwinzikamnotho,” kusho uJammine.
UMnuz Dawie Roodt oyisazi somnotho se-Efficient Group, uthe uMboweni ukhulume kahle ngoba unekele abantu isimo sezimali sezwe.
“Okubuhlungu wukuthi uzoboleka imali ukuze athuthukise umnotho. Angayiboleka imali kodwa lokhu kusho ukuthi siyanda isikweletu sezwe.
Kufanele eze nezinhlelo ezicacile zokukhokha isikweletu. Yize kunjalo angikholwa ukuthi izwe lizofakwa kwinzikamnotho,” kusho uRoodt.
Uthe bazobubheka ngeso lokhozi ubudlelwano bukaMboweni nezinyunyana ngoba ngeke zijabule ngesiphakamiso sokuthi akufanele zifune ukunyuselwa amaholo ngokweqile.
Mayelana nokutakulwa kweSAA, uthe akaqondi yingani le nkampani isatakulwa ngoba ihlale ichitha imali.
URoodt noJammine bathe ukususwa kwentela emaqakelweni noflawa ngeke kuyinciphise imali eqoqwa wuhulumeni kodwa okubi wukuthi kuzohlomula nezicebi ngalesi sinyathelo.
UMnuz Alf Lees weDA uthe abaneme neze ngokutakulwa kweSAA ngoba ukube kudayiswa ingxenye encane yayo ngabe uhulumeni akadingi ukumosha imali kule nkampani. Ugxeke i-ANC ngokunqaba ukuthi kudayiswe ingxenye encane yeSAA nokuthi imali esetshenziswa kule nkampani ngabe kunyuswa ngayo isibonelelo sezingane ngoR34 ukuze sisuke kuR410 ngenyanga sibe wuR444 ngenyanga.
Lokhu uthe ngabe kusiza abazali bezingane ukuthi bathenge ukudla okunomsoco nezinye izidingo.