Usonga ngokudalula amahlazo aseNdumeni
IMEYA yaseNdumeni esihoxa, uMnuz Sboniso Mbatha, isabisa ngokugeqa amagula ngenkohlakalo yaseNdumeni uma beyivulela icala noma beyikhokhisa imali esolwa ngokuthi yayikhwabanisa.
UMbatha ukusho lokhu izolo ngemuva kokuhoxiswa kwecala abebekwe lona Oklebe enkantolo yaseDundee.
“Ngithi bayangibhedela labo abathi mina angikhokhe imali yamakhilomitha. Basho ukuthi yimi yini ebengizikhokhela amakhilomitha ngoba bakhona abasebenzi abebenza lokho. Okwesibili bayayazi imoto yami ebengiyisebenzisa. Nakuba ngingafuni ukuphawula kakhulu ngalo mbiko woMnyango wezokuBusa ngokuBambisana neziNdaba zoMdabu kodwa ayikho into ephambene engiyenzile. Uma beqhubeka nokungikhokhisa bangivulele necala ngizodalula konke abakwenza. Okokuqala kuzomele bakhokhe le mali engu-R4 million abayinikeza esinye sezikhulu,” kusho uMbatha.
Uthe ujabule njengoba ephumile ecaleni futhi ufisa izwe lazi ukuthi isipokwe siphumile ngoba baningi abese bejabule bebhalela amaphepha befonela nemisakazo bekhuluma ngaye.
UMbatha kufanele agcine kuleli sonto eNdumeni kanti naye akasafuni ukuba khona njengoba ethi usejahe ukuba yilungu lomphakathi elejwayelekile.
Lo mholi uneminyaka engu-31 ubudala kanti ungene esikhundleni eneminyaka engu-29.
Ngaleso sikhathi ubenguSihlalo wesiyingi se-IFP saseNdumeni okumanje sibhekene nezinkinga ngenxa yokulwa kwangaphakathi.
UMbatha ufake incwadi yokwesula ngokusemthethweni ngoLwesine oludlule. NgoMsombuluko yamukelwa umkhandlu idluliswa imenenja kamansipala eyihambise kwa-IEC ukuze namhlanje kumenyezelwe ngokusemthethweni ukuthi umkhandlu awusenayo imeya.
“Ngithi sibuyile isipoki ngakho bonke labo abebefonela oKhozini, eGagasini nakwiKhwezi bekhuluma ngami abaphinde bafone basho ukuthi sengiphumile. Ngisho necala lelo ebengibekwe lona bekuyinto engekho ngoba angikaze mina ngiphathe isibhamu futhi angiyiphathi ke eyesibhamu esingekho emthethweni. Mina nje angingenanga ngisho ebhokisini namhlanje ngingaphandle,” kusho uMbatha.