Zisale dengwane iziguli esibhedlela
ZISALE dengwane iziguli zasesibhedlela Osindisweni abasebenzi balesi sibhedlela beshiya phansi ukusebenza, izolo bethi ngeke baqhubeke nokusebenza kusekhona izikhulu zesibhedlela abazisola ngokungaphathi kahle.
Abasebenzi abangaphansi kwenyunyana iNehawu, bathi uMnyango wezeMpilo kulesi sifundazwe uwuhlabe inhlali ngezikhalo zabo, ezihlanganisa ukuthi kwenziwe uphenyo ngokusetshenziswa kwezimali kulesi sibhedlela, ukushoda kwabasebenzi, ukushoda kwemithi nezinsizakusebenza nokungalungiswa kwesibhedlela.
UMnuz Ayanda Zulu iphini likanobhala wale nyunyana eThekwini, uthe ngoMeyi bakhala emnyangweni becela ukuthi ulungise lezi zinto ezingenhla, kodwa babona sengathi uhudula izinyawo ngoba akukho nokukodwa osukulungisile.
“Ezikhaleni ezingaphezu kuka20 ezikhona kulesi sibhedlela kwakhangiswa ezithathu futhi akekho umsebenzi oseqashiwe kuzo. Abahlengikazi bashaywa yiziguli zibasola ngokungawenzi kahle umsebenzi ngenxa yolayini abade kanti lokho kwenziwa ukuthi bayashoda,” kusho yena.
Uthe bakholwa ukuthi izikhulu zalesi sibhedlela okungumphathi wesibhedlela uNkk Ntombenhle Ngcobo, umphathi wehhovisi likandabazabantu nomphathi wezezimali kulesi sibhedlela yibo abenza ukuthi singaphumi isisombululo, ngokuthumela imibiko engachazi isimo njengoba sinjalo emnyangweni.
“Ngemuva kwemashi yethu yangoMeyi kwaba khona imihlangano phakathi kwenyunyana nomnyango. Ngemuva kokuhlangana nathi siyazi ukuthi umnyango wafuna umbiko kubo laba baphathi esathi sicela baphenywe. Ngokubona kwethu umbiko wabo awusichazi ngendlela isimo sakulesi sibhedlela njengoba singalungiswa nje. Sekufike lapho sithi ngeke sibuyele emsebenzini besekhona ngoba zonke lezi zinkinga zenzeka ngaphansi kobuholi babo,” kusho yena.
Okhulumela uMnyango wezeMpilo KwaZulu-Natal uNksz Ncumisa Mafunda, uthe: “Iyamangaza futhi iyakhathaza nokho imibiko ngesiteleka esingekho emthethweni, ikakhulukazi ngoba umnyango unobudlelwano obuvulelekile neNehawu futhi usebenza ngokubambisana nayo. Kusukela ngo-Meyi umnyango ubuxoxisana nenyunyana ngenhloso yokusombulula izikhalo zabasebenzi, futhi uzoqhubeka nalokhu. Sifisa ukuxolisa kunoma ubani okungenzeka ukuthi uphazamisekile ngenxa yalesi siteleka.”
UNksz Sphesihle Nxumalo obezolanda isifutho njengoba enesifuba somoya, uthe abasebenzi bamtshele ukuthi akusetshenzwa kodwa ubesahleli ngoba akazi ukuthi uma eba nenkinga ekhaya uzosebenzisani.
Akuyena yedwa obelokhu encike esangweni enethemba lokuthi uzosizakala.
UNkk Mavis Khuzwayo obezolanda amaphilisi eBP naye uthe kunzima ukuthi agoduke ngoba iphilisi lokugcina uliphuze ekuseni.