Baphuthunyiswe esibhedlela abafundi kusha igumbi lesikole
KUNGENISWE esibhedlela abafundi abathathu abalashelwa ukuthuka ngenxa yokuqubuka komlilo esikoleni abahlala ngaphakathi kuso eHarding, ePort Shepstone.
Kudingeke badedelwe ekuseni abafundi bamabanga aphansi eSehole Combined izolo emuva kokuqubuka komlilo egunjini okubekwa kulo izimpahla zesikole. Kuthiwa umlilo okungaziwa ukuthi udalwe yini, uqubuke ngehora lesithlanu ekuseni, kwabona umfundi obeyolanda umfaniswano wakhe wesikole kuleli gumbi.
Okhulumela uMasipala uMuziwabantu, uNksz Nkosikhona Zwane, uthe bathumele ithimba lezicishamlilo ngokushesha, umlilo wakhalimeka.
“Abasebenzi bethu basizane neFarmers Association okuyinhlangano eqokwe uMasipala ukubheka amapulazi. Ithimba elibhekelele izinhlekelele lithole ukuthi sisodwa isakhiwo esishile okuyilapho bekubekwe khona izimpahla. Bathathu abafundi abangeniswe esibhedlela eSt Andrews ngenxa yalesi sigameko,” kusho uNksz Zwane.
Uthishanhloko uMnuz Gugulakhe Cebisa uthe ukufunda kuphazamiseke kuphela kubafundi bamabanga aphansi njengoba lesi sikole esiseduze nemishini sixubile.
“Sibagodukisile abafundi ngoba bebeseduze nalapho kushe khona. Abafundi abayiswe isibhedlela abalimalanga kodwa siyalelwe ukuthi bayolashelwa ukwethuka,” kusho uCebisa.
Uthe namuhla bonke abafundi bazobuyela esikoleni.
Okhulumela amaphoyisa KwaZulu-Natal, uColonel Thembeka Mbele, uthe kuphenywa icala lokucekela phansi impahla emuva kokuba bebikelwe ngokusha kwesikole ngezithuba zabo-5 ekuseni. Uthe akwaziwa ukuthi umlilo udalwe yini.