Kuzohlomula abalimi ohlelweni lokutshala eKZN
UKUTSHALA zonke izikhathi zonyaka kuzosiza ukunyusa umthamo wokudla kulesi sifundazwe. Lokhu kushiwo uNgqongqoshe wezoLimo nokuThuthukiswa kweMiphakathi yaseMakhaya, uMnuz Themba Mthembu ngesikhathi evula isikhathi sokutshala kulesi sifundazwe njengoba sekusentwasahlobo. UbeKwaJili eHarding, ngoLwesibili.
Uthe lo mnyango ngo-2016 wabuyekeza indlela okutshalwa ngayo kulesi sifundazwe wathatha isinqumo sokuthi kukhuthazwe ukuthi kutshalwe zikhathi zonke.
Uthe lo mnyango uhlose ukuthi kukhuphuke izinga lokhukhiqiza ukudla okunomsoco kuphinde kukhuliswe abalimi basuke esigabeni sokulimela ukudla nemindeni balimele ukudayisa.
“Kulo nyaka thina singumnyango zizotshala umhlaba ongamahektha angu16 310, okuzodala amathuba omsebenzi kubantu abangu-500 emikhakheni eyehlukene kwezolimo, kusukela kubashayeli bogandaganda, abahlakuli kanye nabazovuna. Balinganiselwa ku-10 230 abalimi abazothola usizo okuhambisana nalolu hlelo lokukhuthaza ukuthi kutshalwe zikhathi zonke,” kusho yena.
Umphakathi wokuqala ozohlomula kulolu hlelo lokutshala zikhathi zinke owasepulazini iNaseni-Mkhoba, eliseHarding elinomhlaba ongamahektha angu-70. Kuleli pulazi kutshalwa ummbila odayiselwa isigayo iNgeli Mill khona eHarding.
“Amalunga amaningi alo mhlaba ngabantu besifazane kanti batshala ummbila oyisitshalo esibalulekile kuleli zwe,” kusho uMthembu.
Uthe bafuna ukwandisa izitshalo abaqhakambisa ukutshslwa kwazo kungabi ummbila nobhontshisi kuphela.
UMthembu uthe sebefuna nokwengeza amazambane namantongomane.
Uthe lo mnyango ube nezingqinamba zenkohlakalo kanti emasontweni azayo bazokhipha imininingwane yezokuxhumana yawo wonke amahhovisi omnyango ezifundazweni ukuze abantu bakwazi ukuthola usizo nezidingo zokutshala.