UScott nesinqumo sokuvikela abasebenzi
UNGQONGQOSHE wezeziMali KwaZuluNatal, uNkk Belinda Scott uthole incwadi evimbela Amadelangokubona neFederation for Radical Economic Transformation (Ffret) nomholi wayo uMnuz Malusi Zondi ukuthi bamise ukusebenza kulo mnyango.
Esitatimendeni esithunyelwe kwabezindaba, uNkk Scott uthe Amadelangokubona, iFFRET noZondi basabisa abasebenzi bakhe ngoSepthemba 6 yingakho eye enkantolo ukuze abavikele.
“Ngifuna ukuvikela abasebenzi bami, osonkontileka nazo zonke izinhlelo zentuthuko ezenziwa wuMnyango wezeziMali, asifuni kuphazinyiswe muntu futhi siyabonga ukuthi inkantolo isivunile. Ukuphepha kwabasebenzi kumqoka kimi,” kusho uNkk Scott.
Uthe akagcinanga ngokuthola incwadi yokuvimbela Amadelangokubona neFFRET ekusabiseni abantu kodwa uphinde wawavulela icala.
UNkk Scott wesekwa wuNdunankulu waKwaZuluNatal uMnuz Willies Mchunu nekhabhinethi yonke.
Uthe ngeke avume ukuthi uhulumeni abanjwe ngobhongwane ngabantu abenza izigameko zobugebengu.
UZondi uthe bayazi ukuthi uNkk Scott ubavulele icala futhi sebeke bavela enkantolo bacela ukunikwa amasonto amabili ukuze beze nezethulo zabo.
“Siyawuhlonipha umthetho siyiFFRET neDelangokubona ngoba siyakholwa ukuthi akekho ongaphezu komthetho. Sifisa ukubonisana nohulumeni, ezwe uhlangothi lwethu. Kuyasixaka ukuthi uma sithi sifuna ukusebenzisana naye silethe intuthuko emiphakathi yethu yena asifake emajele. UNkk Scott umele inhlangano ethile njengoba ewuNgqongqoshe wezeziMali akakwazi ukuzithathela izinqumo ngaphandle kokuxoxa nenhlangano yakhe. Sifuna ukusebenza njengosomabhizinisi silethe intuthuko ezindaweni esihlala kuzo ngokubambisana nohulumeni,” kusho uZondi.