Azojeza amaphoyisa evideo ye-matric dance
ASENKINGENI amaphoyisa ophiko oluqapha imibhikisho emphakathini abonakale kwi-video ephelezela abafundi ababeya kwi-matric dance yesikole saseNewcastle.
Ibamba likaKhomishana wamaPhoyisa KwaZuluNatal, uLt General Nhlanhla Mkhwanazi, useyalele inhloko yalolu phiko, iPublic Order Police ukuthi iphenye ngalesi sehlakalo esenzeke emasontweni amabili edlule.
UMkhwanazi ne-IFP basigxekile lesi senzo, bathi izinsiza ezisebenzile bekungangcono ukube zisebenze endaweni ebezidingeka kuyona.
Kule video kuvela imoto yamaphoyisa, inyala ifika kulo mcimbi bese kwehla ababeye kulo mcimbi wesikole, kwehle nabazishaye zaphelela ezamaphoyisa kubalwa nezinto ezigqokwa ngamaphoyisa ePOP uma kunemibhikisho.
Laba bagqoke ezamaphoyisa babonakala bephethe namahawu amaphoyisa bese bema ulayini, kungene phakathi laba bafundi ababili bese bebaphelezela.
Kuba nabashutha ngamaselula, abafundi baze bangene ngaphakathi bekakwe ngamaphoyisa.
“Ngikhathazekile ngengikubonile.
“Ngifuna labo abavela kule video ukuthi baphenywe ngoba abakwenzile akuhambisani nemigomo yokuziphatha yamaphoyisa nomthethosisekelo wezwe.
“Ngiyavumelana nabaphawulile ezinkundleni zokuxhumana abakhala ngokuthi izinsiza ezisebenzile bezingasiza kwezinye izindawo,” kusho uMkhwanazi.
Umholi we-IFP esiShayamthetho sesifundazwe, uMnuz Blessed Gwala, unxuse ukuthi kumiswe amaphoyisa abonakala kule video ezishaye zaphelela ephelezela laba bafundi.
Ugxeke ukusetshenziswa ngendlela okungeyiyo kwezinsiza zamaphoyisa.
“Kumele kuthathelwe izinyathelo ezinqala abathintekayo kulokhu.
“Sifuna ukwazi ukuthi ngubani ovumele amaphoyisa ukuthi aphelezele abafundi nokuthi uvume ngaphansi kwaziphi izimo,” kusho uGwala.
Uthe badinga izimpendulo wathi uNgqongqoshe wezokuphepha komphakathi, uMnuz Mxolisi Kaunda, kumele ajube uphenyo.
“Uma abaphathi bamaphoyisa bengahambisani nokuxhashazwa kwezinsiza zombuso kumele bathathe izinyathelo ngaphandle kokuchema.
“Amaphoyisa kumele alandele imigomo yokusebenza ebekiwe.”
Uthe amaphoyisa asebenzisa budedengu izinsiza kumele athathelwe izinyathelo.
“Kwesinye isikhathi amaphoyisa asebenzisa izimoto zikahulumeni ukuyokhithiza ezitolo.
“Kwesinye isikhathi uthola izimoto zipake emathaveni nasema-casino kodwa akukho okwenziwayo ukunqanda lokhu.
“Umphakathi ukhathele ukuxhashazwa kwezinsiza zombuso ekubeni ukhokha intela,” kusho uGwala.