Bashiye imali bethuswa yintuthu otsotsi
BASAGCWELE amathafa abesilisa ababaleke bashiya phansi isamba semali elinganiselwa kuR50 000 yesitolo esidayisa utshwala oLundi, abayiphuce unogada obezoyiqoqa.
Kuthiwa laba balisa bashiye le mali ngemuva kokuthuswa yintuthu ebiphuma ebhokisini lemali.
Lesi sigameko kuthiwa senzeke enxanatheleni yezitolo zasoLundi, iKing Senzangakhona Shopping Centre ngoMsombuluko .
Unogada wemoto ethwala imali yakwaG4S kuthiwa ubeqeda ukuphuma esitolo uLundi Tops Liquors ngesikhathi ethi ubuyela emotweni nebhokisi ebeligcwele imali elibizwa nge-tribus, wazithela kwabesilisa ababili abebehlomile bamkhomba ngesibhamu bathi akalethe ibhokisi abeliphethe, bamphuca nesibhamu sakhe.
“Laba bebesuka emotweni abebeyipake erenki yamatekisi eyiToyota Corolla emhlophe.
“Kuthe uma beqeda ukuphuca unogada ibhokisi lemali babaleka baqonda ngaserenki nokuthe uma bewela umgwaqo lavele lakhipha intuthu bethuka balilahla phansi babaleka bangena kule moto abebephume kuyo yashaya yachitha nabo.
“Ibhokisi lelo lisale lishunqa intuthu eluhlaza,” kusho omunye wabazibonele.
Kube sekuphuthuma amaphoyisa asoLundi endaweni yesigameko nokuyiwo okuthiwa afike acosha leli bhokisi ebelisashunqa.
Okhulumela amaphoyisa KwaZulu-Natal, uColonel Thembeka Mbele usiqinisekisile lesi sigameko wathi empeleni imali isiyonke ibinguR56 000.
“Le mali itholakale ingonakele ngemuva kokuthi kuqhume udayi ochaphazela imali uma kubanjwa inkunzi.
“Le mali ibuyiselwe kumphathi wenkampani iG4S kanti kulesi sigameko akekho olimele kodwa abasolwa bashaye bachitha kanti amaphoyisa asabathungatha,” kusho uColonel Mbele.
UColonel Mbele uthe icala liphenywa amaphoyisa ophiko lobugebengu obuhleliwe elizinze eRichards Bay.